Birneshe óńirde mal urlaıtyn qylmystyq top quryqtaldy
ASTANA. KAZINFORM – Elimizdiń úsh oblysynda toptasyp mal urlaǵandar ustaldy. Tolyǵyraq Іshki ister mınıstrliginiń resmı ókili Shyńǵys Álekeshev aıtyp berdi.
– Abaı oblysynda jaıylymda júrgen 50-den astam jylqyny urlaǵan qylmystyq top ustaldy. Topta 4 adam áreket etken. Sonymen qatar Aqmola oblysynda 46 jylqyny urlap ketken 2 adamnan turatyn top quryqtaldy. Odan bólek, Pavlodar oblysynda 6 adamnan turatyn qylmystyq top 25-ten astam jylqyny urlaǵan. Qylmyskerler jol talǵamaıtyn motokóliktermen maldy alysqa aıdap ketken, - dedi Shyńǵys Álekeshev vedomstvoda ótken onlaın baspasóz máslıhatynda.
Іshki ister mınıstrligi mal urlyǵynyń aldyn alý jáne azaıtý maqsatynda Aýyl sharýashylyǵy mınıstrligimen birlesken jumys istep jatyr.
– Іshki ister mınıstrligi men Aýyl sharýashylyǵy mınıstrliginiń veterınarlyq baqylaý qyzmetiniń mal urlyǵyna qarsy ózara is-qımyl týraly buıryq ázirlendi. Mal urlyǵynyń aldyn alýdyń tıimdi ádisteriniń biri – jedel-profılaktıkalyq is-sharalardy turaqty ótkizý. Atalǵan is-sharaǵa polıtseıler, veterınarlyq baqylaý qyzmetkerleri jáne jergilikti atqarýshy organdardyń ókilderi qatysady, - deıdi ol.
Vedomstvo ókiliniń aıtýynsha, ótken jyly mal urlyǵyna qarsy 2 respýblıkalyq jáne 76 óńirlik deńgeıde is-shara ótti.
Aıta keteıik, elimizde mal urlyǵy 30,5 paıyzǵa azaıdy. Sondaı-aq Qazaqstanda mal urlyǵy jazasy qatańdatyldy.