Birneshe oqý ornynyń ishinen tańdaýym «Real Madrıdke» tústi – sheteldegi qazaq qyzy
ASTANA. KAZINFORM – Kúni keshe qazaq qyzynyń madrıdtik «Real» klýbyna qyzmetke ornalasqanyn jazǵan edik.
Marketolog «Búgin LIVE» baǵdarlamasyna onlaın baılanysqa shyǵyp, álemdik brendke aınalǵan fýtbol quramasyna qalaı tap bolǵanyn aıtyp berdi.
– Bul óte qyzyqty jol. Meniń alǵashqy mamandyǵym – marketolog. Almatydaǵy KIMEP ýnıversıtetin aıaqtadym. Óz salam boıynsha 13 jyldan beri qyzmet etip kele jatyrmyn. Mamandyǵymdy qatty jaqsy kóremin. Ótken jyly sporttyq marketıng salasy boıynsha bilim alýǵa sheshim qabyldadym. Al oqý úshin Ispanııa memleketin tańdadym. Birneshe oqý oryndarynyń ishinen tańdaýym «Real Madrıdke» tústi. Sebebi olar memlekettik úlgidegi dıplom beredi. Sonymen qatar Ispanııada turýǵa, úzdikterden bilim alýǵa, álemdik deńgeıdegi brendtik klýbta jumys isteýge ońtaıly múmkindik boldy, – deıdi Albına Býneský.
13 jyldan beri marketologııa salasynda tájirıbesi bar maman sporttyq marketologtyń negizgi mindetin túsindirdi.
– Sporttyq marketolog – sport ındýstrııasynyń kez kelgen baǵytynda federatsııalarmen, klýbtarmen, atlettermen jumys isteıdi. Sporttyq marketologtyń basty mindeti – ol qaı salada jumys istese de, sol sporttyń atyn shyǵarý. Ekinshiden, sportqa, sporttyq uıymǵa tabys tabýǵa kómektesý. ıAǵnı tıimdi bıznes-model quryp, turaqty monetızatsııa joldaryn oılastyrý, brendtiń tanylýyna járdemdesý, jankúıerlermen ǵana emes, osy salada damýǵa kómektesetin kez kelgen adamdarmen kommýnıkatsııa qurý. Úshinshi fýnktsııasy – uıymdastyrylyp jatqan túrli sporttyq sharalar men týrnırlerdi basqarý jumystaryna kómektesý, – deıdi marketolog.
«Real Madrıdte» qyzmet etetin qazaqstandyq arý elimizdegi sport salasyn damytýdy ózine maqsat etken.
– Oqýymdy bitirgen soń Qazaqstanǵa qaıtyp, sonda jumys isteýdi josparlap otyrmyn. Men elimdi qatty saǵyndym. Sebebi meniń sporttyq marketıngti oqýdaǵy negizgi maqsatym – Qazaqstandaǵy sportty damytý. Men elimizdegi sport salasynan óte úlken bolashaq kóremin. Bizde jańadan salynǵan, salynyp jatqan sporttyq ǵımarattar óte kóp. Biraq menedjmentke kelgende mamandar jetispeı jatady. Sol sebepti osy baǵytta tereń bilim alýym kerektigin túsindim, – deıdi ol.
Aıta keteıik, qazaqstandyq arý otandyq drondardy jasap shyǵarmaq.