Birneshe oblysta qańtar oqıǵasy kezinde urlanǵan qarý-jaraqtar tabyldy
ASTANA. KAZINFORM — Jedel-izdestirý is-sharalary barysynda polıtseıler birneshe oblystyń aýmaǵynda qarý jasyrylǵan tórt oryndy tapty, dep habarlaıdy Polisia.kz.
Olardyń úsheýinde qańtar oqıǵasy kezinde urlanǵan qarý-jaraq pen oq-dáriler anyqtaldy.
Іshki ister mınıstrligi zańsyz aınalymnan qarýdy, onyń ishinde qańtar oqıǵasy kezinde urlanǵan qarý-jaraqty tabý jáne tárkileý boıynsha jumysty jalǵastyrýda. Máselen, Jarkent qalasynyń mańynda qaraýsyz qalǵan ǵımaratta Remington 11-87 markaly tegis uńǵyly myltyq tabylyp, tárkilendi (qańtar oqıǵasy kezinde urlanǵan).
Jambyl oblysy Birlesý aýylynyń shetinde qarý jasyrylǵan jer tabyldy, onda Benelli modeliniń tegis uńǵyly myltyǵy (qańtar oqıǵasy kezinde urlanǵan), qos uńǵyly ańshy myltyǵy, qol granatasy jáne tórt patron tárkilendi.
Sonymen qatar Jańatas qalasynyń janynda tegis eki uńǵyly myltyq, gaz tapanshasy jáne úsh oq-dári jasyrylǵan oryn anyqtaldy. Almaty oblysyndaǵy kentterdiń birinde aryqtan ártúrli kalıbrli eki ańshy myltyǵy (olardyń biri qańtar oqıǵasy kezinde urlanǵan), jaryq-shý granatasy, AK-74 magazıni, jeti patron jáne qara taktıkalyq betperde tabyldy. Nómirler joıylǵan qarý-jaraq pen oq-dárilerge qatysty qosymsha tekserýler júrgiziledi.
— Vedomstvo osy baǵyttaǵy jumysty júıeli túrde jalǵastyrýda. Sońǵy úsh jylda jedel is-sharalardyń, tintý men reıdterdiń arqasynda túrli 8 119 qarý, 845 granata, 114 myńnan astam oq-dári tabylyp, tárkilendi. Sondaı-aq qarý jasyrylǵan 738 oryn tabyldy, — delingen ІІM baspasóz qyzmeti taratqan aqparatta.
Osyǵan deıin aqpan aıynyń basynda qańtar oqıǵasy kezinde urlanǵan qarý-jaraqtar tabylǵanyn jazǵan edik.