Birneshe memlekettik portaldyń jumysynan tehnıkalyq aqaý shyqty
ASTANA. KAZINFORM — Qazir birneshe memlekettik portal qoljetimsiz. Bul týraly «Ulttyq aqparattyq tehnologııalar» AQ habarlaıdy.

— Memlekettik organdardyń serverlik ortalyǵy ınfraqurylymy jelisindegi tehnıkalyq aqaýǵa baılanysty qazir birqatar servıs ýaqytsha qoljetimsiz. Osyǵan baılanysty, eGov.kz portalynyń komponentteri men eGov Mobile qosymshasynyń, E-license jáne ashyq Úkimet portalynyń, memlekettik organdardyń biryńǵaı ınternet portalynyń jáne ulttyq aqparattyq tehnologııalar qyzmeti júıeleriniń jumysy ishinara qoljetimsiz, - delingen habarlamada.
Qazir mamandar tehnıkalyq aqaýdy joıyp jatyr.
— Sonymen qatar halyqqa qyzmet kórsetý ortalyqtarynda jáne ekinshi deńgeıli bank qosymshalarynda memlekettik qyzmetterdi alýǵa ýaqytsha qoljetimsiz bolýy múmkin ekenin habarlaımyz, - deıdi mekemeden.