Birneshe halyqaralyq áýe kompanııa Venesýelaǵa reısin toqtatty

ASTANA. KAZINFORM — AQSh-tyń eskertýinen keıin birneshe halyqaralyq áýe kompanııasy Venesýelaǵa reısin toqtatty, dep habarlaıdy Reuters.

AQSh federaldy avıatsııa ákimshiliginiń iri áýe kompanııalaryna el ústinen ushý kezinde «qaýipsiz jaǵdaı» týraly eskertkennen keıin úsh halyqaralyq kompanııa Venesýeladan ushýyn toqtatty.

Flightradar24 jáne Simon Bolívar Maiquetia halyqaralyq áýejaıynyń resmı saıtynyń habarlaýynsha, senbi kúni brazılııalyq Gol men kolýmbııalyq Avianca áýe kompanııasy jáne TAP Air Portugal Karakastaǵy reısterin tejedi.

TAP Air Portugal senbi men kelesi seısenbige josparlanǵan reısterdiń toqtatylǵanyn rastady.

— Bul sheshim AQSh avıatsııalyq bıligi Venesýela áýe keńistigindegi qaýipsizdik jaǵdaılaryna kepildik berilmeıtinin kórsetetin aqparattan keıin qabyldandy, — dedi kompanııa ókilderi.

Ispanııanyń Iberia áýe kompanııasy da dúısenbiden bastap Karakasqa reısterdi toqtatty. Biraq ıspandyq kompanııanyń Venesýela astanasynan Madrıdke senbi kúnge josparlanǵan reısi ushyp ketti.

— Kompanııa osy elge reısterdi qashan qalpyna keltirý kerektigin sheshý úshin jaǵdaıdy baqylaıdy, — dedi Iberia áýe kompanııasynyń ókili.

Federaldyq avıatsııa ákimshiliginiń keńesi «qaýipsizdik jaǵdaıy nasharlap, Venesýelada nemese onyń aınalasynda áskerı belsendiliktiń artqany» týraly eskertý jasady. Sondaı-aq barlyq bıiktiktegi ushaqtarǵa qaýip tónýi múmkin ekenin aıtty.

Osyǵan deıin Donald Tramp Venesýelada qurlyqtaǵy áskerı operatsııanyń júrgizilý múmkindigin joqqa shyǵarmady.