Birlik merekesine oraı sý tasqynymen kúresken bir top aqmolalyq marapattaldy
KÓKShETAÝ. KAZINFORM — Kókshetaýda Qazaqstan halqynyń birligi kúnine arnalǵan saltanatty is-shara ótip, onda kóktemgi sý tasqynyń saldaryn joıýǵa atsalysqan bir top aqmolalyq marapattaldy.
Bıyl óńirdegi birlik merekesi sý tasqynynan keıingi jaǵdaı aıasynda qarsy alynady. Halyqtyń birligi arqasynda sý tasqynyna qarsy kúreste birde-bir aqmolalyq kómek pen nazardan tys qalmady.
Merekelik sharada órt sóndirýshiler, qutqarýshylar, polıtsııa qyzmetkerleri, eriktiler, kásipkerler, medıtsına qyzmetkerlerine qurmet kórsetildi.
Saltanatty jıynda oblys basshysy barlyq qatysýshylardy kele jatqan merekemen quttyqtap, kún saıyn elimizdegi kelisim, birlik pen beıbitshilikti saqtaýǵa óz úlesterin qosatyn barlyq aqmolalyqqa alǵysyn jetkizdi.
«Qazaqstan halqy Assambleıasynyń „Birlik. Jasampazdyq. Órleý“ 33-shi sessııasynda Memleket basshysy Qazaqstan halqy Assambleıasynyń qoǵamdyq sanany jańǵyrtýǵa qatysýdaǵy rólin atap ótip, respýblıkadaǵy turaqtylyqty, etnosaralyq jáne konfessııaaralyq kelisimdi nyǵaıtý, Qazaqstan halqynyń ulttyq biregeıligi men birligin nyǵaıtý boıynsha birqatar jańa mindetter qoıdy. Birneshe apta boıy qutqarýshylar, polıtsııa qyzmetkerleri, áskerıler, eriktiler, medıtsına qyzmetkerleri jáne basqalar kúndiz-túni qıyn jaǵdaıda jerlesterine kómektesý úshin aıanbaı eńbek etti. Qıyn kezde oblystyń árbir turǵyny birliktiń, janashyrlyqtyń jáne bir birine degen qamqorlyqtyń jarqyn úlgisin kórsete bildi», — dedi Marat Ahmetjanov.
Kezdesý barysynda óńirdiń qoǵamdyq-saıası ómirine, sondaı-aq sý tasqyny kezeńinde jáne qoǵamdyq kelisimdi nyǵaıtýda óz úlesterin qosqan is-sharaǵa qatysýshylar marapattaldy.
Eresektermen birge sý tasqyny saldaryn joıý sharalaryna óskeleń urpaq ókilderi de óz úlesin qosty.
Máselen, Bulandy aýdanyndaǵy «Baldyrǵan» balabaqshasynyń tárbıelenýshisi Abaı Aǵzam óziniń jasyna qaramastan aýdandyq shtabta gýmanıtarlyq kómek jınaýǵa kómektesti.
Aqmola oblysy TJD Aqkól qalasyndaǵy № 26 órt sóndirý bóliminiń qyzmetkeri, órt sóndirý kóliginiń júrgizýshisi aǵa serjant Danııar Ańsarıev órt brıgadasynyń quramynda sý tasqyny jaǵdaıyn joıý úshin Arshaly aýdanynyń Jibek joly aýylyna jiberildi.
Jergilikti atqarýshy organdarmen birlesip barlyq kezeńde 2 myńnan astam qap tasymaldandy jáne eldi mekenderge azyq-túlik pen dári-dármek jetkizildi.
Erigen qar sýyn sorý boıynsha jumystar júrgizilip, bógetter nyǵaıtyldy.
Sonymen birge, shara barysynda Kókshetaýdaǵy sý tasqynynan zardap shekken Shılovtar men Sársenbaevtar otbasylaryna páter kilti tabys etildi.
Jalpy, oblys ortalyǵynda barlyǵy 14 otbasy baspanaly boldy.
Aıta ketsek, budan buryn Kókshetaýda sý tasqynynan zardap shekken 8 otbasy baspanaly bolǵanyn jazǵan edik.
