Birlik kúnine oraı 5 myńnan astam is-shara ótedi
ASTANA. KAZINFORM – 1 mamyr – Qazaqstan halqynyń birligi kúni. Bul kún – el ishindegi tatýlyq pen kelisimniń, aýyzbirshilik pen yntymaqtyń aıqyn kórinisi.
Memleket basshysy atap ótkendeı, birlik pen etnosaralyq kelisim – memlekettik saıasattyń negizgi baǵyttarynyń biri.
Búginde elimizde 100-den astam etnos ókili tatýlyq pen kelisimde ómir súredi. Elde 1 myńnan astam etnomádenı birlestik pen 4 myńnan astam qoǵamdyq qurylym jumys istep, birlikti nyǵaıtý men mádenıetaralyq dıalogty damytýǵa úles qosyp keledi.
Memleket tarapynan barlyq etnostyń tilin, mádenıeti men salt-dástúrin saqtaýǵa jáne damytýǵa qajetti jaǵdaı jasalǵan. Bul baǵytta el ishindegi tatýlyq pen yntymaqtyń uıytqysyna aınalǵan 36 Dostyq úıi jumys isteıdi.
Qazaqstan halqynyń birligi kúnin merekeleý aıasynda elimiz boıynsha 5 myńnan astam is-shara ótedi.
Orta jáne mektepke deıingi bilim berý uıymdarynda «Birlik sabaqtary» ótkiziledi. Joǵary oqý oryndary men kolledjderde «Birlik kópiri» atty stýdenttik estafeta bastaldy.
1 mamyr kúni oblys ortalyqtarynyń negizgi alańdarynda otandyq estrada juldyzdarynyń qatysýymen merekelik kontsertter, sondaı-aq jármeńkeler men tanymdyq mádenı baǵdarlamalar uıymdastyrylady.
Etnomádenı birlestikter el birligin nyǵaıtýǵa baǵyttalǵan «Qazaqstan – ortaq úıimiz» jalpyulttyq chellendjin bastady.
Qaıyrymdylyq mádenıetin damytýǵa da aıryqsha mán berilýde. Etnomádenı birlestikter ókilderi qaıyrymdylyq jáne ekologııalyq bastamalarǵa belsendi qatysýda. «Taza Qazaqstan» aktsııasy aıasynda 3 myńnan astam aǵash otyrǵyzylyp, 40 tonnadan astam turmystyq qaldyq shyǵaryldy.
Sondaı-aq, «Qaıyrymdylyq kerýeni» aktsııasy aıasynda 700-den astam qaıyrymdylyq jobasy iske asyryldy.
