Birlik kúni: Spectrum mektebinde jármeńkeden jınalǵan qarajat muǵalimniń emine berildi
ASTANA. KAZINFORM – Birlik kúnine oraı elordanyń Spectrum halyqaralyq mektebinde dástúrli «Unity Day» qaıyrymdylyq jármeńkesi ótti. Onda 800-ge jýyq qonaq mektep aýlasynda bas qosyp, álemniń 30-dan astam eliniń mádenıeti men taǵamdary tanystyryldy.
Spectrum halyqaralyq mektebinde 30-dan asa elden kelgen oqýshy bilim alady. Ata-analar men oqýshylar óz elderi boıynsha ulttyq parad uıymdastyryp, mádenıetterin tanystyra aldy. Al kontserttik baǵdarlamalar, san alýan ulttyq taǵamdar, sheberlik saǵattary men mádenı kórmeler jáne Maldıv araldaryna 5 adamǵa arnalǵan joldama utysy qonaqtardyń qyzyǵýshylyǵyn týdyrdy.
Sonymen birge, festıval aıasynda qaıyrymdylyq jármeńkesi uıymdastyryldy jáne jınalǵan 4,5 mıllıon teńge qarajat «Bilim-Innovatsııa» qorynyń muǵalimi Baqtııar Omarovtyń baýyr transplantatsııasyna beriledi.
− Búgin Spectrum International School Qazaqstandaǵy mádenı alýan túrlilik pen yntymaqty beıneleıtin mańyzdy mereke — Birlik kúnin atap ótýde. Bizdiń mektepte 30-dan astam elden kelgen balalar bilim alady jáne biz ártúrli mádenıetterdi, dástúrler men tilderdi qurmettep, qoldaıtyn orta qalyptastyryp otyrǵanymyzǵa maqtanamyz. Bul kún bizdiń ár túrli bolǵanymyzǵa qaramastan, adamgershilik, ózara qurmet jáne birlikke umtylý biriktiretinin kórsetedi. Al qaıyrymdylyq jármeńkesi oqýshylarymyzǵa bilimmen qatar, empatııa, áleýmettik jaýapkershilik jáne kómek kórsetýge daıyn bolý sııaqty mańyzdy qasıetterdi damytýǵa múmkindik beretinine senimdimiz. Bul – jahandyq oılaý qabileti bar kóshbasshylardy tárbıeleýdiń shynaıy maqsaty, − dedi mektep dırektory Djonatan Fereıra.
Festıvalde Úndistan, Pákistan, Serbııa, Saýd Arabııasy, Ózbekstan, Ońtústik Koreıa, Irak, Indonezııa, Mysyr jáne Grýzııanyń elshilikteri óz memleketterin resmı túrde tanystyrdy.
Sonymen qatar, mádenıet pen yntymaqtastyq rýhynda Qazaqstan, AQSh, Japonııa, Túrkııa, Frantsııa, Qytaı, Ulybrıtanııa, Germanııa, Italııa, Ispanııa, Meksıka, Brazılııa, Belgııa, Aýstrııa, Malaızııa, Argentına, Ázerbaıjan, Qatar, Kenııa, Jańa Zelandııa, Belarýs sııaqty elder tanystyryldy.
Aıta keteıik, 1 mamyr merekesiniń qurmetine búgin elordada zııatkerlik vıktorınalar men kórmelerden bastap túrli kontsertter men jarystarǵa deıin ondaǵan mádenı-sporttyq is-shara ótip jatyr.
Qazaqstan halqy Assambleıasynyń 30 jyldyǵyna oraı, elimizdiń barlyq óńirinde «Birlik júgirisi – 2025» respýblıkalyq marafony ótti.