Birlik kúni: Astanada jóndeýden ótken úsh aýla paıdalanýǵa berildi
ASTANA. KAZINFORM — Astananyń Baıqońyr aýdanynda Qazaqstan halqynyń birligi kúni qarsańynda keshendi jóndeýden ótken úsh aýla saltanatty túrde ashyldy, dep habarlaıdy qala ákimdiginiń resmı saıty.
Jańartylǵan aýlalar Respýblıka dańǵyly, 16, 18 jáne Otyrar kóshesi, 18 mekenjaılarynda ornalasqan.
Atalǵan aýmaqtarda balalarǵa arnalǵan oıyn alańdary jańartylyp, shaǵyn sáýlettik formalar men jattyǵý qurylǵylary ornatyldy, sondaı-aq asfalt jabyny tolyq aýystyryldy.
Jóndeý jumysy jaz mezgili bastalar aldynda aıaqtalyp, dástúrli Aýla kúnimen tuspa-tus keltirildi.
Baıqońyr aýdanynyń ákimi Talǵat Rahmanberdiniń aıtýynsha, 2026 jyly aýdanda aýlalardy jańǵyrtýdyń aýqymdy baǵdarlamasyn iske asyrý josparlanyp otyr.
— Bıyl biz jańadan 20 aýla ashýdy josparlap otyrmyz. Onda jabyn, shaǵyn sáýlettik formalar, sport alańdary, oryndyqtar, qorshaýlar men asfalt tolyqtaı jańartylady. Budan bólek, taǵy 50 aýlada jóndeý-qalpyna keltirý jumysy júrgiziledi. Osylaısha, aýdan boıynsha aýlalardy jóndeý boıynsha qajettilikti tolyq jabamyz, — dedi aýdan ákimi.
Sońǵy úsh jylda Baıqońyr aýdanynda barlyǵy 252 aýlanyń 200-den astamy jóndeýden ótken.
Jańartylǵan aýlalardy ashý dástúrli túrde turǵyndardyń ózderi uıymdastyratyn merekelik is-sharamen qatar ótedi.
— Biz jumystardy jazǵy demalys bastalǵanǵa deıin aıaqtaýǵa tyrysamyz, sonda balalar, ata-analar men qarttar ýaqytyn jaıly ótkize alady. Al merekelik is-shara — turǵyndardyń bastamasy: olar anımatorlardy shaqyryp, túrli is-sharalar uıymdastyryp otyr, al biz atqarylǵan jumystyń nátıjesin kórsetemiz, — dedi Talǵat Rahmanberdi.
Ákimdik málimetinshe, abattandyrý jobalary turǵyndardyń tikeleı qatysýymen «Halyq qatysatyn bıýdjet» baǵdarlamasy arqyly ázirlenedi.
Baıqońyr aýdanynyń turǵyndary 1 naýryzǵa deıin óz usynystaryn joldap, onda bolashaq aýlanyń eskızi men smetasyn usynǵan.
Budan buryn elordada bıyl qandaı kósheler salynatyny belgili boldy.