Birlik kerýeni: Almaty kóshelerinde qazaq batyrlary atpen júrip ótti
ALMATY. KAZINFORM – Astanada ótetin V Dúnıejúzilik kóshpendiler oıyndaryna Almatydan «Birlik kerýeni» jolǵa shyqty.
Sport delegatsııasynyń quramyna aýdaryspaq boıynsha aǵa jattyqtyrýshy Ashat Rysov, qazirgi qazaq kúresiniń negizin qalaýshylardyń biri Elemes Álimhanov, QR Qazaq kúresi federatsııasynyń birinshi tóraǵasy Erǵalı Muhıddınov, qusbegilik «Qyran» federatsııasynyń prezıdenti Baǵdat Múptekeqyzy, toǵyzqumalaq boıynsha jattyqtyrýshy Álimjan Qydyrbaev, qazaq kúresinen QR eńbek sińirgen jattyqtyrýshysy Baýyrjan Tálip, sporttyń qurmetti qaıratkeri, asyq atýdan jattyqtyrýshy Aıtalap Qorǵambaev, Almaty qalasy boıynsha ulttyq oıyndardy uıymdastyrý jónindegi jaýapty úılestirýshi Nurlan Ospanov engen.
Qazaqstan astanasyna oıyndardyń mádenı baǵdarlamasyna qatysatyn shyǵarmashylyq ujymdar da attandy, «Kóshpendiler álemi» etnoaýylyn uıymdastyrý úshin kıiz úıler jiberildi.
Saltanatty sharanyń mańyzdy elementi Dostyq dańǵylynyń boıyndaǵy Abaı atyndaǵy alańǵa deıin Birlik kerýeniniń teatrlandyrylǵan kórinis kórsete júrip, ótýi boldy. Atqa mingen qazaq batyrlary Almaty delegatsııasynyń ókilderi Astanaǵa aparatyn Aıýsaı shatqalynan kıeli sýdy jetkizdi.
Esterińizge sala keteıik, sý birinshi Dúnıejúzilik kóshpendiler oıyndarynyń basty qasıetti sımvoly jáne negizgi elementi boldy. Almatyda sý Aıýsaı sarqyramasynan alyndy.
Birlik kerýenine qatysýshylar arasynda Nomad atty akrobatıkalyq toby, «Arlan jete» ulttyq dástúrler teatrynyń akterleri, «Alataý» dástúrli óner teatrynyń akterleri jáne qalanyń segiz aýdanynyń ókilderi bar.
Oıyndardyń ashylý kúni, 8 qyrkúıekte, elimizdiń ár óńirinen kıeli sýmen toltyrylǵan torsyqtary (shynaıy bylǵarydan jasalǵan qazaq ulttyq ydystary) bar batyrlardan turatyn jarqyn sherý rásim ótetin jerge barady.
Buǵan deıin ulttyq jáne at sporty klýbynyń jetekshisi Nurlan Ospanov Qusbegilik saıysy Dúnıejúzilik kóshpendiler oıynyna alǵash ret qosylatyny týraly aıtqan edi.
