Birlesý arqyly damý: «AMANAT» partııasy Saıası keńesiniń málimdemesi
ASTANA. KAZINFORM – Elordada Májilis spıkeri, «AMANAT» partııasynyń Tóraǵasy Erlan Qoshanovtyń tóraǵalyǵymen partııanyń Saıası keńesiniń otyrysy ótti. Onyń qorytyndysy boıynsha memlekettegi progressıvti qoǵamdyq-saıası kúshterdi Ádiletti jáne Progressıvti Qazaqstandy qurý jolynda jumyla jumys isteýge shaqyrǵan málimdeme qabyldandy. Otyrysqa Saıası keńes pen partııa Bıýrosynyń músheleri, Ortalyq apparattyń basshylyǵy, óńirlik fılıaldardyń tóraǵalary men atqarýshy hatshylary qatysty.
Óz sózinde Erlan Qoshanov jýyrda Memleket basshysy Memlekettik tý kóterý rásiminde el damýynyń jańa baǵytyn aıqyndap, barlyq salaýatty ári progressıvti qoǵamdyq-saıası kúshterdi jalpyulttyq qundylyqtar men maqsattar tóńiregine toptasýǵa shaqyrǵanyn atap ótti. Osyǵan baılanysty, «AMANAT» jaýapty saıası partııa retinde Memleket basshysynyń úndeýin tolyq qoldaıdy jáne eldi damytýǵa baǵyttalǵan aýqymdy prezıdenttik kún tártibin júzege asyrý jolynda eńbek etýge daıyn barlyq kúshpen óz áleýetin biriktirýge daıyn.
– Búgin biz osy tarıhı kezeńniń mańyzyn tereń túsinýimiz kerek. Jańa Konstıtýtsııanyń qabyldanýymen Táýelsiz Qazaqstannyń jańa dáýiri bastaldy. Eshqandaı asyra silteýsiz aıtar bolsaq, bul – halqymyz qoldaǵan Prezıdentimizdiń asa iri jetistigi ári saıası jeńisi. Endi bizdiń aldymyzda jańa Konstıtýtsııada belgilengen barlyq maqsatty júzege asyrý mindeti tur. Bul – jalǵyz atqarýǵa kelmeıtin kúrdeli jumys. Ol bizden judyryqtaı jumylýdy, birlik pen kelisimdi talap etedi. Búgin biz qoǵamǵa jaýapkershilik pen uıymshyldyqtyń úlgisin kórsetýimiz qajet, - dedi Erlan Qoshanov.
Otyrys barysynda Májilis depýtaty Snejanna Imasheva jańa Konstıtýtsııa kúshine enýiniń tarıhı mańyzyn atap ótip, qoǵamdyq-saıası kúshterdi memleketti damytýdyń strategııalyq mindetteri tóńireginde toptasýǵa shaqyrdy.
Almaty oblystyq fılıalynyń tóraǵasy Qýat Baıǵodjaev Prezıdent bastamashy bolǵan reformalar óńirlerdiń serpindi damýyna yqpal etip, júrgizilip jatqan ózgeristerge degen azamattar senimin nyǵaıtyp otyrǵanyn aıtty.
Mańǵystaý oblystyq fılıalynyń jetekshisi Nurbek Qarasaev memlekettiń aýqymdy qoǵamdyq-saıası jańǵyrýy jaǵdaıynda qoǵamdyq kelisim men birlikti saqtaýdyń mańyzyna nazar aýdardy.
Májilis depýtaty Erlan Saırov Ata Zańnyń kúshine enýi jańa saıası kezeńdi ashatynyn aıtyp, el táýelsizdigin nyǵaıtý jolynda kúsh-jigerdi biriktirýge shaqyrdy.
«AMANAT» partııasynyń Saıası keńesi málimdemesiniń mátinimen osy jerden tanysýǵa bolady.
