Birikken Ulttar Uıymy: hýsıtter bosatqan uıymnyń 12 qyzmetkeri Iemennen ketti

ASTANA. KAZINFORM – Birikken Ulttar Uıymy Iemen aýmaǵynan óziniń 12 qyzmetkeri shyqqanyn resmı túrde habarlady. Bul qyzmetkerler buǵan deıin Sanada ornalasqan BUU kesheninde hýsıtterdiń qamaýynda qalǵan edi. Olar elden BUU Gýmanıtarlyq áýe kóligi qyzmeti (UNHAS) júzege asyrǵan arnaıy reıs arqyly ushyp shyqty, dep habarlaıdy Kazinform WAM agenttigine silteme jasap.

BUU Nıý-Iorktegi shtab-páterinde búgin taratylǵan resmı memorandýmda Sanada ustalǵandar arasynda bolǵan taǵy úsh qyzmetkerdiń qazirgi ýaqytta erkin júrip-turýǵa jáne elden shyǵýǵa quqyǵy bar ekeni aıtyldy.

Málimdemede qazirgi tańda 53 BUU qyzmetkeri hýsıtter tarapynan erikten tys, ıaǵnı zańsyz qamaýda otyrǵany, sondaı-aq birqatar úkimettik emes uıymdardyń, azamattyq qoǵam ókilderiniń jáne dıplomatııalyq mıssııa qyzmetkerleriniń de ustalǵany atap ótildi.

Qujatta BUU Bas hatshysy Antonıý Gýterrıshtiń osy adamdardy dereý jáne eshqandaı shartsyz bosatýǵa shaqyrǵan talap-ótinishi taǵy da rastaldy. Sonymen qatar Birikken Ulttar Uıymy bul máseleni barlyq deńgeıde muqııat baqylaýda ustaıtynyn, sonyń ishinde hýsıttermen, múshe memlekettermen jáne tıisti seriktestermen turaqty túrde baılanys ornatyp, barlyq ustalǵandardyń bosatylýyn qamtamasyz etý baǵytynda jumys júrgize beretinin málimdedi.

Aıta keteıik, buǵan deıin ıemendik hýsıtter BUU-nyń 20 qyzmetkerin tutqynǵa alǵanyn jazǵanbyz.

Kóp uzamaı hýsıtter BUU-nyń ustalǵan bes qyzmetkerin bosatty.