Birikken kúres áleminiń basshylary Astanaǵa saparmen keldi

Qazaqstan kúres federatsııasynyń habarlaýynsha, Sapar aıasynda UWW basshylary Astana qalasynda birqatar mańyzdy kezdesý ótip, otandyq kúresti damytýǵa baǵyttalǵan strategııalyq bastamalar júzege asyryldy.

Qazaqstan kúres federatsııasynyń prezıdenti Erkin Oqasovtyń arnaıy shaqyrýymen kelgen qonaqtarǵa elordamyzda salynyp jatqan Qazaqstan kúres akademııasy tanystyryldy. Akademııada grek-rım kúresi, erkin kúres jáne áıelder kúresinen bólek, jaǵajaı kúresiniń balýandary da jattyǵyp, halyqaralyq dodalarǵa daıyndyqtaryn pysyqtaı alady. Budan bólek, Akademııa aıasynda medıtsınalyq jáne sporttyq-ǵylymı laboratorııalar da ashý kózdelgen.

Sonymen qatar, Astana qalasynda Qazaqstan kúres federatsııasy jańa keńsesiniń resmı ashylý saltanaty ótti. Saltanatty rásim barysynda lenta qııý qurmeti Federatsııa prezıdenti Erkin Oqasov pen Nenad Lalovıch myrzalarǵa buıyrdy.

Keńse quramynda Qazaqstan kúresiniń baı tarıhyna arnalǵan arnaıy Dańq zaly ashyldy. Munda Olımpıada jáne álem chempıonattarynda atoı salǵan qazaq balýandarynyń tarıhı jetistikterin beıneleıtin biregeı jádigerler qoıylǵan. Atap aıtqanda, chempıondardyń medaldary, belbeýleri, jarys formalary, fotosýretteri men jeke arhıvtik materıaldary kelýshiler nazaryna usynylǵan.

Aıta keteıik, sapardyń negizgi nátıjeleriniń biri — Qazaqstanda kúres sportyn júıeli túrde damytýǵa baǵyttalǵan mańyzdy qujatqa qol qoıylýy boldy. Atap aıtqanda, Qazaqstan kúres akademııasy United World Wrestling aıasynda jumys istep, álemniń úzdik balýandarynyń ortalyǵyna aınalady.

— Bul bastama elimizde jas balýandardy daıarlaý júıesin jańa deńgeıge kóterip, halyqaralyq standarttarǵa sáıkes mamandardy qalyptastyrýǵa jol ashýy tıis. Sonymen qatar, akademııa otandyq jáne sheteldik tájirıbeni biriktiretin bilim berý jáne jattyǵý ortalyǵyna aınalyp, búkil álem balýandary kóz tigetin júıe qurylady dep senemiz, — dedi Erkin Qadyrǵalıuly.

Óz kezeginde halyqaralyq uıym basshylary Qazaqstannyń kúres sportyn damytýdaǵy qarqynyna joǵary baǵa berip, aldaǵy ýaqytta ózara yntymaqtastyqty odan ári nyǵaıtýǵa daıyn ekenderin jetkizdi.

Qazaqstanǵa is-sapar barysynda sheteldik qonaqtarǵa Astana qalasyndaǵy Jekpe-jek saraıy, «Barys-Arenadan» bólek, Almaty qalasynyń da sporttyq nysandary tanystyryldy.

Osyǵan deıin habarlaǵanymyzdaı, qazaqstandyq balýan Tynys Dúbek Bishkek qalasynda (Qyrǵyzstan) ótip jatqan áıelder kúresinen Azııa chempıonatynyń jartylaı fınalynda jeńilip qaldy.