Birikken Arab Ámirlikteri Qazaqstanǵa izdeýde júrgen úsh adamdy ustap berdi
ASTANA. KAZINFORM – Buǵan deıin habarlanǵandaı, Qazaqstan Respýblıkasy Bas Prokýrorynyń orynbasary Ashat Jumaǵalı bastaǵan Bas prokýratýra delegatsııasy Birikken Arab Ámirlikterinde ótken Qylmystyń aldyn alý men qylmystyq sot tóreligi jónindegi BUU-nyń 15-shi Kongresiniń jumysyna qatysty.
Sapar barysynda BAÁ Ádilet mınıstri jáne Bas prokýrorymen kezdesý ótkizilip, qylmysqa qarsy kúres pen izdeýde júrgen adamdardy ekstradıtsııalaý salasyndaǵy ózara is-qımyldy nyǵaıtý máseleleri talqylandy.
Qol jetkizilgen atalǵan ýaǵdalastyqty iske asyrý sheńberinde Bas prokýratýra, Ulttyq qaýipsizdik komıtetiniń Sybaılas jemqorlyqqa qarsy qyzmeti men Іshki ister mınıstrliginiń Interpol Ulttyq Ortalyq Bıýrosymen birlesip, Qazaqstannyń Birikken Arab Ámirlikterindegi Elshiliginiń qoldaýymen qylmystyq jaýaptylyqqa tartý úshin atalǵan elden Qazaqstannyń úsh azamatyn ekstradıtsııalady.
Olardyń bireýi 2019–2020 jyldary sybaılasymen birge Astanada halyqaralyq ortalyq salýǵa arnalǵan jer ýchaskesin alýǵa járdemdesýge ýáde berip, aldaý jolymen jábirlenýshiniń jalpy somasy 368 myń AQSh dollary qarajatyn ıemdengen.
Taǵy bir fıgýrant densaýlyqqa qasaqana aýyr zııan keltirý, tonaý men buzaqylyq jasaǵany úshin izdeýde bolǵan. Ol 2021 jyly Almaty qalasynda adamdar toby bolyp jábirlenýshige shabýyl jasap, onyń densaýlyǵyna aýyr zııan keltirgen jáne jalpy somasy 100 myń teńgeden asatyn jeke múlkin ashyq túrde ıemdengen.
Úshinshi kúdikti osy jylǵy jazda Astana qalasynda Qytaı azamatynyń 24 200 AQSh dollaryn urlady degen kúdikke ilingen, bul asa iri mólsherge jatady.
Atalǵan tulǵalar qylmys jasaǵannan keıin qylmystyq qýdalaý organdarynan jasyrynǵan, osyǵan baılanysty halyqaralyq izdeýge jarııalanǵan. Keıinnen olardyń Birikken Arab Ámirlikteriniń aýmaǵynda júrgeni anyqtalyp, Qazaqstan Respýblıkasy Bas prokýratýrasynyń suraý salýy boıynsha elge ekstradıtsııalandy.
Bas prokýratýra qazirgi ýaqytta kúdiktiler tergeý ızolıatoryna qamalǵanyn habarlady. Sotqa deıingi tergep-tekserý qaıta bastaldy.
Shetelden kólik ákelemin dep 106 mln teńgeni ıemdengen kúdikti Reseıden ekstradıtsııalanǵanyn jazǵan edik.
