Birqatar zań men zańǵa táýeldi aktilerdi jańa Konstıtýtsııaǵa sáıkestendirý kerek — Úkimet basshysy
ASTANA. KAZINFORM — Úkimet jańa Konstıtýtsııany ilgeriletý boıynsha is-sharalar josparyn ázirlep, bekitedi. Bul týraly Úkimet otyrysynda Premer-mınıstr Oljas Bektenov aıtty.
— Qazaqstandyqtar Memleket basshysynyń barlyq bastamalaryn qoldap, óz daýystarymen naǵyz otanshyldyqtyń úlgisin pash etti. Búginde jahan jurtynyń Qasym-Jomart Toqaevtyń kóshbasshylyǵyna jáne qabyldanǵan Konstıtýtsııamyzdyń progressıvti sıpatyna kýá bolǵanyn kórip otyrmyz. Bul Qazaqstannyń joǵary bedeli men júrgizilip jatqan reformalardyń tıimdiligin aıqyn bildiredi. Óz kezeginde, biz Prezıdenttiń komandasy retinde, aldymyzda turǵan maqsat-mindetterge qol jetkizip, reformalardyń sapasy men ozyq qarqynyn qamtamasyz etýimiz kerek, — dedi Oljas Bektenov.
Onyń aıtýynsha, Memleket basshysynyń tapsyrmasyn oryndaý aıasynda Úkimet Parlamentpen birlesip, tez arada birqatar zań men zańǵa táýeldi aktilerdi jańa Konstıtýtsııaǵa sáıkes keltirýge tıis.
— Atap aıtqanda, 5 jańa jáne qoldanystaǵy 8 konstıtýtsııalyq zańǵa, sondaı-aq 60-tan astam zańǵa, onyń ishinde negizgi kodeksterge túzetýler engizý kerek. Sonymen qatar Konstıtýtsııany ilgeriletý boıynsha is-sharalar josparyn ázirlep, bekitý qajet. Bul Ata zańdy jappaı basyp shyǵarýdy, ony qoljetimdi elektrondyq platformalarda ornalastyrýdy, bilim berý salasy úshin ádistemelik nusqaýlar men oqý-ádistemelik quraldardy ázirleýdi talap etedi. Sondaı-aq elimizdiń jańa Konstıtýtsııasy týraly aqparattyq-túsindirý jumystaryn kúsheıtý qajet, — dedi Úkimet basshysy.
Aıta keteıik, Úkimet jańa Konstıtýtsııa normalaryn júzege asyrý joldaryn talqylap jatyr.
