Birqatar ishki ister organdarynyń basshysy jemqorlyq úshin sottaldy

ASTANA. KAZINFORM – Sybaılas jemqorlyqqa qarsy qyzmet quqyq qorǵaý organdaryndaǵy jemqorlyqtyń jolyn kesýge erekshe nazar aýdarady. Osy aıda birqatar ishki ister organdarynyń basshysy sottaldy.

Málim bolǵandaı, Óskemen qalasynyń soty qalalyq basqarmanyń ákimshilik polıtsııa bóliminiń bastyǵy A. A. Ternopolskııge jáne basqa adamdarǵa qatysty para alý faktileri boıynsha úkim shyǵardy.

«Ol júıeli negizde mamandandyrylǵan turaqtardan avtokólik quraldaryn zańsyz bergeni úshin 20-dan 50 myń teńgege deıingi somada para alǵan. Sot úkimimen oǵan «polıtsııa podpolkovnıgi» arnaıy ataǵynan aıyra otyra aıyppul salyndy», - delingen habarlamada.

Sonymen qatar, osy úkimmen paraqorlyqqa deldaldyq jasaǵany úshin Óskemen q. PB patrýldik polıtsııa batalony vzvodynyń komandıri R. A. Baıtanbalıev jáne ShQO PD ÁPB ınspektory M. B. Erbakov, sondaı-aq kómek kórsetkeni úshin — № 5 órt sóndirý bóliminiń qaraýyl bastyǵy D. T. Bıekenov sottaldy.

Aıyppuldardyń jalpy somasy 22 mln teńgeden asty.

QR QK 41-babyna sáıkes aıyppul belgilengen merzimde tólenbegen jaǵdaıda jaza sharasy bas bostandyǵynan aıyrýǵa aýystyrylady.

Astana qalasynyń qylmystyq ister jónindegi aýdanaralyq sotymen Esil aýdany PB anyqtaý bóliminiń bastyǵy E. Jumanov 5 jylǵa shartty túrde sottaldy.

Ol aýyr qylmys jasaǵan aıyptalýshyny qylmystyq jaýapkershilikten zańsyz bosatqany jáne dáleldemelerdi burmalaǵany úshin kináli dep tanyldy.

Úkimder zańdy kúshine endi.

«Aqtóbe oblysynyń aýdandyq sotymen oblystyq polıtsııa departamenti Mártók aýdandyq polıtsııa bólimi bastyǵynyń orynbasary A. M. Erǵalıev 5 jyl 6 aıǵa bas bostandyǵynan aıyrýǵa sottaldy. Ol memleketke 243 mln teńgeden astam somaǵa zalal keltirýge ákep soqqan zattaı dáleldemelerdi (612 myńnan astam qorap temeki) jeke menshikke zańsyz berý jolymen laýazymdyq ókilettikterin asyra paıdalanǵany úshin kináli dep tanyldy», — dep habarlady agenttiktiń baspasóz qyzmeti.

Aqtaý qalalyq soty oblystyq polıtsııa departamenti kóshi-qon qyzmeti basqarmasy bastyǵynyń orynbasary Sh. Qalmurzaevty 3 jyl 6 aıǵa bas bostandyǵynan aıyrýǵa sottady, ol el aýmaǵynda bolǵan kezde jalpy qamqorlyǵy úshin sheteldikten 3 mln teńge kóleminde para alǵan.

Barlyq sottalǵan adamdar arnaýly ataqtarynan jáne memlekettik qyzmette laýazymdardy atqarý quqyǵynan aıyryldy.

Úkimder zańdy kúshine engen joq.