Birqatar shaıdyń quramynan tyıym salynǵan zattar tabylyp, satylymnan alynyp tastaldy
ASTANA. KAZINFORM – Bas memlekettik sanıtar dárigerdiń qaýlysy boıynsha, birqatar shaıdyń satylymyna shekteý qoıyldy.
— Qazaqstan Respýblıkasy Bas memlekettik sanıtarııalyq dárigeriniń 2026 jylǵy 5 qańtardaǵy № 1-PGSV qaýlysymen halyqtyń sanıtarııalyq-epıdemıologııalyq salamattylyǵy salasyndaǵy baqylaý maqsatynda satyp alý nátıjeleri boıynsha tıisti normatıvtik quqyqtyq aktilerdiń, Keden odaǵynyń «Tamaq ónimderiniń qaýipsizdigi týraly» (021/2011 KO TR), «Taǵamdyq qospalardyń, hosh ıistendirgishterdiń jáne tehnologııalyq qosalqy quraldardyń qaýipsizdigi talaptary» (029/2012 KO TR), «Tamaq ónimderin qaptamalaý bóliginde» (022/2011 KO TR) tehnıkalyq reglamentteriniń talaptaryna sáıkes kelmeıtin shaıdy ákelýge jáne satýǵa tyıym salyndy, — dep habarlady Densaýlyq saqtaý mınıstrliginiń Sanıtarııalyq-epıdemıologııalyq baqylaý komıteti.
Halyqtyń sanıtarııalyq-epıdemıologııalyq qaýipsizdigi salasynda baqylaý maqsatynda satyp alý jáne saraptama júrgizý barysynda quramynda taǵamdyq boıaǵyshtar (sary «kún batýy» (E110), tartrazın (E102), ponso 4R (E124)) bar qara shaıdyń óndirilip, satylý faktileri anyqtaldy. Olardy shaıda qoldanýǵa ruqsat etilmeıdi.
Budan bólek, halyqtyń sanıtarııalyq-epıdemıologııalyq qaýipsizdigi salasyndaǵy tergeý barysynda shaı qaptamalarynda shaı óndirisi men qaptalýynda rastalmaǵan mekenjaılardyń kórsetilgeni anyqtaldy. Bul qyzmetti júzege asyrýǵa ruqsat berý qujattarynyń joqtyǵyn kórsetedi.
Osyǵan baılanysty, kelesi qara shaı ataýlarynyń ákelinýi men satylýyna tyıym salyndy:
— «Apamnyń sháıi Premium gold», «Al-Hayat» Golg, «BALQIıA Premium gold», óndirýshisi «Orda Trade Astana» JShQ (Almaty oblysy) óndirisi;
— «Sultan Suleyman», «Pakistan tea», óndirýshisi «Real Trade Astana» JShQ (Astana q.)
— «BALQIıA Premium gold», óndirýshi «Al-Hadııa» JQ (Almaty q.);
-«Aje Onim», óndirýshi «Orda Chaı» JQ (Almaty q.) «Kaltsıı» JShS tapsyrysy boıynsha:
— «Al-Hayat» Golg, óndirýshi «Empire KENIY E.P.Z. Limited» (Almaty oblysy);
— «Al-Jannat Premium», óndirýshi «Ferdaus» JQ (Almaty q.);
— «Alfarah» (óndirýshisi qaptamada kórsetilmegen).
— Shamamen 600 keli shaı aınalymnan alyndy. Bul — otandyq óndirýshilerdiń ónimi. Sonymen qatar Eýrazııalyq ekonomıkalyq komıssııadan keıbir shaı ataýlarynyń eksportqa da shyǵarylǵany jóninde aqparat tústi. Atap aıtqanda, Reseı Federatsııasyna jáne Qyrǵyzstanǵa jóneltilgen ónimderden de boıaǵysh zattar anyqtalǵan, — dedi Sanıtarlyq-epıdemıologııalyq baqylaý komıtetiniń ádep jónindegi ýákili Áıgerim Sádýbaeva Jibek joly telarnasyna bergen suhbatynda.
Aıta keteıik, 45 jastan asqandarǵa shaı ishýdi azaıtqan jón. Sebebi shaı adam aǵzasyna kaltsııdiń sińýin tejeıdi.
Shaıdyń zııany men paıdasy týraly «Búgin LIVE» baǵdarlamasyna suhbat bergen dıetolog maman aıtyp berdi.