Birqatar óńirde júk kólikterine shekteý qoıylady

ASTANA. KAZINFORM – Qazaqstannyń birqatar óńirinde 23 naýryz ben 1 mamyr aralyǵynda aýyr júk kólikteriniń qozǵalysyna ýaqytsha shekteýler qoıylady. 

Bul sharalar jyl saıyn kóktem mezgilinde, ıaǵnı qar erip, sý tasyǵan kezde jol negiziniń bosap, osal bolýyna baılanysty qabyldanady. Shekteýler jol jabyndysynyń buzylýyn boldyrmaýǵa baǵyttalǵan.

— 23 naýryzdan bastap Aqmola, Aqtóbe, Shyǵys Qazaqstan, Batys Qazaqstan, Qaraǵandy, Qostanaı, Soltústik Qazaqstan, Pavlodar jáne Abaı oblystaryndaǵy avtojoldarda qozǵalys shekteledi. Bul ereje jalǵyz oske túsetin júktemesi 8 tonnadan asatyn júk kólikterine qatysty bolyp tabylady jáne 1 mamyrǵa deıin jalǵasady.

Sonymen qatar, elimizdiń ońtústik jáne batys óńirlerinde osyǵan uqsas kóktemgi shekteýler qazirdiń ózinde engizilip qoıǵan. Olar Almaty, Atyraý, Jambyl, Qyzylorda, Mańǵystaý, Túrkistan, Jetisý jáne Ulytaý oblystarynda 1 sáýirge deıin kúshinde bolady, — delingen Kólik mınıstrligi habarlamasynda.

Aıta keteıik, bul shekteýler halyqaralyq tasymaldarǵa, jolaýshylar kóligine, sondaı-aq azyq-túlik, dári-dármek jáne tótenshe jaǵdaılardyń júkterine qoldanylmaıdy. Jol tósemi ylǵaldanyp, negizi jumsaratyn kezeńde joldardyń sapasyn saqtaý úshin mundaı sharalar jyl saıyn júzege asyrylyp turady. 

Eske salsaq 2026 jylǵy qańtardan bastap Qazaqstanda jalpy paıdalanymdaǵy avtomobıl joldarymen samosvaldardyń júrýine qatysty erejeler qaıta qaraldy. Burynǵy formaldy tyıymdar alynyp tastalǵanymen, salmaq pen oske túsetin júktemeni baqylaý kúsheıtilip, is júzinde tolyq avtomattandyryldy.