Birqatar óńirde jańbyr jaýyp, naızaǵaı oınaıdy
ASTANA. KAZINFORM – Qazgıdromet 17 tamyzǵa eldiń birqatar óńirinde aýa raıyna baılanysty eskertý jarııalady. Sınoptıkter naızaǵaı, burshaq, shkval, qatty jel, tuman, aptap ystyq jáne órt qaýpiniń joǵary bolatynyn eskertti.
Eń kúrdeli aýa raıy eldiń shyǵysy men soltústiginde kútiledi.
Shyǵys Qazaqstan oblysynda jańbyr jaýyp, naızaǵaı oınaıdy. Kúndiz óńirdiń soltústigi men shyǵysynda keı ýaqytta nóser jańbyr pen burshaq jaýyp, qatty jel turady. Batystan soǵatyn jeldiń ekpini 23-28 m/s-qa deıin jetedi.
Abaı oblysynyń soltústiginde, shyǵysynda jáne ońtústiginde naızaǵaımen jańbyr jaýady. Kúndiz burshaq pen qatty jel turýy múmkin. Soltústik-batystan soǵatyn jeldiń ekpini 23-28 m/s-qa deıin kúsheıedi.
Pavlodar oblysynyń batysynda, soltústiginde jáne ortalyǵynda jańbyr jaýyp, naızaǵaı oınaıdy. Batysta qatty jańbyr kútiledi.
Soltústik Qazaqstan oblysynyń batysynda, soltústiginde jáne ońtústiginde jańbyr jaýyp, naızaǵaı oınaıdy. Kúndiz burshaq jaýyp, jel turady. Keı jerlerde jeldiń jyldamdyǵy 25 m/s-qa deıin jetedi. Túnde jáne tańerteń tuman túsedi.
Aqmola oblysynyń batysy men soltústiginde kúndiz burshaq jaýyp, ekpindi jel turady. Túnde jáne tańerteń óńirdiń soltústigi men shyǵysynda tuman bolýy múmkin.
Qostanaı, Qaraǵandy jáne Batys Qazaqstan oblystarynda da naızaǵaı oınap, jańbyr jaýady. Jekelegen aýdandarda túnde jáne tańerteń tuman túsip, jeldiń jyldamdyǵy 15-20 m/s-qa deıin kúsheıedi.
Jetisý oblysynyń shyǵysynda jáne taýly aımaqtarynda ótkinshi jańbyr jaýyp, naızaǵaı oınaıdy. Alakól kólderi aýdanynda jeldiń ekpini keı ýaqytta 23-28 m/s-qa deıin jetedi. Kúndiz aýa temperatýrasy +35 gradýsqa deıin kóteriledi.
Almaty oblysynyń ońtústiginde jáne taýly aýdandarynda ótkinshi jańbyr men naızaǵaı bolýy múmkin. Kúndiz aýa temperatýrasy +35...+36 gradýsqa deıin kóteriledi. Almaty men Qonaevta aýa temperatýrasy +35 gradýsqa jetedi.
Mańǵystaý oblysynyń ońtústiginde aýa temperatýrasy +38 gradýsqa deıin kóteriledi. Keı jerlerde jeldiń ekpini 15-18 m/s bolady.
Túrkistan oblysynyń batysynda kúndiz shańdy daýyl kútiledi. Batysta jáne taýly aımaqtarda jeldiń jyldamdyǵy 15-20 m/s-qa deıin kúsheıedi.
Sondaı-aq Astana qalasynda, Aqtóbe, Jambyl oblystarynda jáne Ulytaý oblysynda qatty jel boljanady. Elordada kúndiz soltústik-batystan soǵatyn jeldiń ekpini 15-20 m/s-qa deıin jetedi.
Atalǵan óńirlerdiń basym bóliginde órt qaýpi joǵary nemese tótenshe deńgeıde saqtalady. Atap aıtqanda, Atyraý jáne Mańǵystaý oblystarynda, Aqtóbe, Jambyl, Túrkistan oblystarynyń jáne Ulytaý oblysynyń kóp bóliginde, sondaı-aq eldiń basqa da óńirleriniń jekelegen aýdandarynda tótenshe órt qaýpi boljanady.
Buǵan deıin «Qazgıdromet» 2026 jylǵy 15-17 tamyzǵa arnalǵan Qazaqstan boıynsha aýa raıy boljamyn jarııalaǵan bolatyn.
