Birqatar elordalyq qutqarýshy mamyr merekelerine oraı baspanaly boldy
ASTANA. KAZINFORM – TJM basshysy elordada qutqarýshylarǵa páter kiltterin tabys etti. Іs-shara Otan qorǵaýshylar kúni men Jeńis kúnine oraı uıymdastyryldy, dep habarlaıdy QR Tótenshe jaǵdaılar mınıstrligi baspasóz qyzmeti.
Tótenshe jaǵdaılar mınıstri general-leıtenant Shyńǵys Árinov qutqarýshylarǵa páter kiltterin tabys etti.
- Memleket basshysynyń atynan azamattarymyzdyń qaýipsizdigi jolyndaǵy kásibılikterińiz, erlikterińiz ben kúndelikti eńbekterińiz úshin rızashylyq jáne qurmet belgisi retinde sizder páter kiltterin alyp jatyrsyzdar. Memleket azamattyq qorǵaý júıesiniń árbir qyzmetkeriniń úlesin joǵary baǵalaıdy, qutqarýshylar men olardyń otbasylaryn qoldaý jumystaryn jalǵastyrady. Qutqarýshylar aldaǵy ýaqytta da óz mindetterin abyroımen atqara beretinine senimdimin, – dep Shyńǵys Árinov atap ótti.
Ónerkásiptik qaýipsizdik jáne memlekettik materıaldyq rezervter komıtetteriniń, TJM Apattar medıtsınasy ortalyǵynyń, TJM «Qazavıaqutqarý» men Astana qalasy Tótenshe jaǵdaılar departamentiniń qyzmetkerleri páter aldy.
Bul bastama azamattardyń qaýipsizdigin qamtamasyz etip, tótenshe jaǵdaılarǵa den qoıý júıesiniń turaqty jumysyn atqaryp júrgen mamandar eńbegine kórsetilgen qurmettiń belgisi boldy.
Osyǵan deıin TJM qutqarýshylarynyń ormandy alapat órtten qorǵap qalǵany týraly jazdyq.
