Birqatar elde Kazakh Invest kompanııasynyń sheteldik ókildikteri ashylady

- Ekonomıkanyń ósýi men halyqtyń ál-aýqatyn jaqsartýǵa ınvestıtsııalardyń kólemi tikeleı áser etetini anyq. Byltyr Investıtsııalyq shtab jalpy quny 115 mlrd dollar bolatyn 212 joba boıynsha problemalyq máselelerdi rettep, aldaǵy jyldary elimizge keletin ınvestıtsııa kólemin ulǵaıtýǵa jaǵdaı jasady. Tikeleı sheteldik ınvestıtsııalar 9 aı ishinde 1,5 mlrd dollarǵa nemese 10,9%-ǵa ósip, 14,9 mlrd dollardy qurady. Bul rette portfeldik ınvestıtsııalar men nesıelik qarajattardy esepke alǵanda, ekonomıkaǵa tartylǵan sheteldik ınvestıtsııalardyń kólemi 58 mlrd dollardan asty. Negizgi kapıtalǵa salynǵan ınvestıtsııalar 13%-ǵa artyp, 22,7 trln teńgeni qurady. Onyń ishinde memlekettik ınvestıtsııalar 800 mlrd teńgege, al jekemenshik ınvestıtsııalar 2,4 trln teńgege ulǵaıdy, - dedi O. Bektenov.

Onyń aıtýynsha, degenmen aıqyndalǵan aýqymdy mindetterdi iske asyrý úshin bul – jetkiliksiz. Sondyqtan ınvestorlardy tartý júıesi kúsheıtildi. Jobalarǵa bastapqy kezeńnen aıaǵyna deıin qoldaý kórsetilip, ár ınvestorǵa «jasyl dáliz» qaǵıdasy boıynsha qolaıly jaǵdaı jasalady. «Báıterek» Holdıngi Qazaqstanda mańyzdy jobalardy júzege asyrý úshin áleýetti ınvestorlardy izdep-tabýǵa proaktıvti túrde kirisip ketti.

- Memleket basshysynyń Jarlyǵymen ınvestıtsııalyq ombýdsmenniń fýnktsııalary Bas prokýrorǵa júkteldi. Prokýrorlyq qadaǵalaý ınvestorlardy quqyqtyq qoldaý sharalaryn kúsheıtýge múmkindik berdi. Sonymen qatar ınvestıtsııalardy tartýdyń syrtqy kontýryn nyǵaıtý maqsatynda ınvestıtsııalyq áleýeti joǵary elderde Kazakh Invest kompanııasynyń sheteldik ókildikteri ashylatyn bolady. Prezıdenttiń bastamasymen qurylyp jatqan Alataý Sıtı ınvestıtsııa tartýdyń jańa ortalyǵyna aınalýǵa tıis. Konstıtýtsııalyq zań jobasynda erekshe quqyqtyq rejımdi jáne zamanaýı basqarý men qala qurylysy normalaryn engizýdi kózdeıtin erejeler qamtyldy, - dedi Úkimet basshysy.

Osyǵan deıin Oljas Bektenov temirjol ınfraqurylymynyń tozý deńgeıi joǵary ekenin aıtty.