Birqatar el EO-ny Izraılmen qaýymdastyq týraly kelisim jasaýdy toqtata turýǵa shaqyrdy
ASTANA. KAZINFORM - Ispanııa, Slovenııa jáne Irlandııa Eýropalyq komıssııany EO men Izraıl arasyndaǵy qaýymdastyq týraly kelisimdi toqtata turý máselesin talqylaýdy bastaýǵa shaqyrdy, dep habarlaıdy Anadoly.
Atalǵan úsh eldiń syrtqy ister mınıstrleri EO-nyń syrtqy saıasat jónindegi basshysy Kaıa Kallasqa birlesken hat joldap, Taıaý Shyǵystaǵy, ásirese Lıvandaǵy ahýalǵa baılanysty odaqtyń ustanymyn shuǵyl qaıta qaraýdy jáne naqty sharalar qabyldaýdy talap etti.
Hat avtorlary Izraıl qabyldaǵan sheshimder adam quqyqtaryna qaıshy kelip, halyqaralyq quqyqty buzatynyn aıtyp, alańdaýshylyq bildirdi. Olar Eýroodaqty óziniń negizgi qundylyqtaryn qorǵaý úshin saıası ári moraldyq jaýapkershilik alýǵa shaqyrdy.
Syrtqy ister mınıstrleri mundaı zańbuzýshylyqtarǵa kóz juma qaramaı, qaǵıdattyq ustanymyn saqtaýy úshin EO-ny belsendi áreket etýge úndedi.
Qujatta Izraılde palestınalyqtarǵa ólim jazasyn engizýdi kózdeıtin zań jobasy adam quqyqtarynyń óreskel buzylýy retinde baǵalanyp, eldiń demokratııalyq qaǵıdattardan alystaýyna ákeletini jáne óńirdegi ahýaldy ýshyqtyratyny atap ótilgen.
Sondaı-aq hatta Lıvanda atysty toqtatý kelisimi quptalyp, barlyq tarapty zorlyq-zombylyqty toqtatý úshin sabyrlyq pen jaýapkershilik tanytýǵa shaqyrǵan.
Izraıldiń qaýymdastyq týraly kelisimniń 2-baby boıynsha mindettemelerin oryndaýyna qatysty burynǵy sholýǵa silteme jasalyp, Tel-Avıvtiń adam quqyqtary salasyndaǵy mindettemelerdi saqtamaǵany naqty kórsetilgeni aıtylǵan.
Úsh eldiń syrtqy ister mınıstrleri qalyptasqan jaǵdaıdy eskere otyryp, EO-ny óz áreketterin qaıta qaraýǵa shaqyryp, barlyq yqtımal nusqalardy qarastyra otyryp, jedel ári batyl sheshimder qabyldaý qajettigin atap ótti.
Eske sala keteıik, 16 sáýirde AQSh prezıdenti Donald Tramp Izraıl men Lıvan arasynda 10 kúndik atysty toqtatý týraly jarııalaǵan edi.
