Birqatar dárilik zattar men medıtsınalyq qyzmetter qosylǵan qun salyǵynan bosatylady

ASTANA. KAZINFORM — QR Densaýlyq saqtaý mınıstrligi birqatar dárilik zattar men medıtsınalyq qyzmetterdi qosylǵan qun salyǵynan bosatýdy kózdeıtin Úkimet qaýlysynyń jobasyn ázirledi.

Halyq úshin qandaı artyqshylyqtary bolady?

• Tegin medıtsınalyq kómektiń kepildik berilgen kólemi men MÁMS sheńberinde sırek (orfandyq) jáne áleýmettik máni bar aýrýlardy emdeýge arnalǵan dári-dármekterdi qosa alǵanda, dárilik preparattardyń baǵasy boıynsha qoljetimdi bolady;
• TMKKK jáne MÁMS sheńberindegi medıtsınalyq qyzmetter, sondaı-aq sırek jáne áleýmettik máni bar aýrýlardy emdeý jónindegi qyzmetter QQS esebinsiz usynylatyn bolady.

Mınıstrlik bul shara patsıentterdi qoldaýǵa jáne emdeýdiń qoljetimdiligin arttyrýǵa baǵyttalǵanyn atap ótti.

— Bizdiń basty mindetimiz — medıtsınalyq kómek pen qajetti dári-dármekterdi adamdarǵa barynsha qoljetimdi etý. QQS-tan bosatý medıtsınalyq uıymdarǵa qarjylyq júktemeni azaıtý jáne patsıentterge ýaqtyly kómek alý úshin kóbirek múmkindikter beredi, — dep atap ótti vedomstvoda.

Qaýlynyń jobasy densaýlyq saqtaý júıesin jetildirý jáne halyqty áleýmettik qorǵaýdy nyǵaıtý jónindegi sharalardyń sheńberinde iske asyrylady.

Osydan buryn Almatyda bıýdjet esebinen alynatyn dári-dármek tizimi keńeıtilgenin jazdyq.