Birqatar avtojoldarda qozǵalys ashylyp, keı ýchaskelerde shekteý engizildi

ASTANA. KAZINFORM – 15 jeltoqsan kúni aýa raıy jaǵdaıyna baılanysty elimizdiń birneshe óńirindegi respýblıkalyq mańyzy bar avtojoldarda qozǵalys rejımi ózgerdi.

Aqtóbe oblysynda «RF shekarasy – Mártók – Aqtóbe – Qarabutaq – Qyzylorda – Shymkent – Taraz – Qordaı – Almaty – Qorǵas – QHR shekarasy» avtojolynyń 835-971 shaqyrym aralyǵynda, ıaǵnı Hromtaý qalasynan Qarabutaq aýylyna deıingi ýchaskede jeńil avtokólikter úshin qozǵalys qaıta ashyldy.

Sonymen qatar saǵat 11:30-dan bastap respýblıkalyq mańyzy bar kelesi avtojol ýchaskelerinde barlyq kólik túrleri úshin qozǵalysqa ruqsat berildi.

Qaraǵandy oblysynda «Astana – Qaraǵandy – Almaty» avtojolynyń 592-750 shaqyrym aralyǵy, Balqash qalasynan Jambyl oblysynyń shekarasyna deıingi bóliginde kólik qozǵalysy ashyldy.

Jambyl oblysynda osy avtojoldyń 2005-2152 shaqyrym aralyǵynda, Qaraǵandy oblysynyń shekarasynan Býrylbaıtal aýylyna deıingi ýchaskede de barlyq kólik túrleriniń qozǵalysy qalpyna keltirildi.

Alaıda birqatar óńirde qolaısyz aýa raıyna baılanysty qozǵalysqa ýaqytsha shekteýler engizildi.

Qaraǵandy oblysynda 15 jeltoqsan saǵat 11:30-dan bastap «Qyzylorda – Jezqazǵan – Qaraǵandy – Shiderti» avtojolynyń 788-906 shaqyrym aralyǵynda, Ulytaý oblysynyń shekarasynan Topar eldi mekenine deıingi ýchaskede barlyq kólik túrleriniń qozǵalysy shekteldi. Atalǵan joldy saǵat 20:00-de ashý josparlanyp otyr.

Sol sııaqty Ulytaý oblysynda dál osy avtojoldyń 756-788 shaqyrym aralyǵynda, Jańaarqa eldi mekeninen Qaraǵandy oblysynyń shekarasyna deıingi bóliginde kóliktiń barlyq túrleri úshin qozǵalys ýaqytsha toqtatyldy. Bul ýchaskede de joldy 15 jeltoqsan saǵat 20:00-de ashý kózdelgen.

Júrgizýshiler men jolaýshylar jol jaǵdaıyna qatysty ózekti aqparatty táýlik boıy 1403 baılanys ortalyǵy arqyly ala alady.

Buǵan deıin Jetisý jáne Abaı oblystarynda respýblıkalyq mańyzy bar joldar jabylǵany habarlanǵan bolatyn.