Birqatar aýrý anyqtaldy: Kıikterge vaktsına egý múmkin emes

ASTANA. KAZINFORM — Kıikterge vaktsına egý múmkin emes. Bul týraly Aýyl sharýashylyǵy mınıstriligi Veterınarııalyq baqylaý jáne qadaǵalaý komıtetiniń tóraǵasy Qazbek Tashımov málim etti.

Atap aıtqanda, búgin Májilistegi Agrarlyq máseleler komıtetiniń keńeıtilgen otyrysynda kıiktiń egis alqaptary men shabyndyqtardy taptap ketýinen Batys Qazaqstan jáne Aqmola oblysynyń fermerleri men aýyl turǵyndary zardap shegip jatqany aıtyldy.

— Kıik sanynyń shekten tys kóbeıýi veterınarııa salasyn da alańdatyp otyr. Epızootııalyq ahýaldyń turaqtylyǵy biz úshin birinshi kezekte tur. Olardyń sanynyń kúrt artýy kóptegen faktorlarǵa alyp kelýi múmkin. Veterınarııa boıynsha ulttyq referenttik ortalyq Jáńgir han atyndaǵy Batys Qazaqstan agrarlyq-tehnıkalyq ýnıversıtetimen birlese birazdan beri epızootııalyq monıtorıngti júrgizip keledi. Jalpy, ulttyq referenttik ortalyq byltyrdyń ózinde jabaıy faýnaǵa 1,5 myńnan astam zertteý jasady. Sonyń nátıjesinde birqatar aýrýlardyń derekteri kezdesti, — dedi Q. Tashımov.

Onyń aıtýynsha, ańnyń arasynda jıi taralatyn aýrýlardyń taralýyna jol bermeý maqsatynda kıikterge vaktsına salý múmkin emes. Sondyqtan júrgizgen monıtorıng nátıjesinde, qoldaǵy malǵa vaktsına egý kórsetkishi artty. Ásirese, kıik kóp taraǵan Batys Qazaqstan oblysynda osy jumystar kúsheıtildi.

Budan buryn habarlanǵandaı, qazaq ǵalymdary kıikti arnaıy tálimbaqta ósirip, zerttep jatqanyn jazǵan edik.