Birqatar áleýmettik járdemaqyny taǵaıyndaý qaǵıdalaryna ózgerister engizildi
ASTANA. KAZINFORM – Bala týǵanda beriletin memlekettik járdemaqy, bala kútimine baılanysty beriletin járdemaqy, kópbalaly otbasylarǵa beriletin járdemaqy, nagradtalǵan anaǵa beriletin járdemaqyny taǵaıyndaý jáne tóleý qaǵıdalaryna ózgerister engizildi.
Eńbek jáne halyqty áleýmettik qorǵaý mınıstriniń buıryǵy «Ashyq NQA» portalynda jarııalandy.
Ózgerister qandaı memlekettik járdemaqylarǵa qatysty:
- bala týýyna baılanysty birjolǵy memlekettik járdemaqy;
- bala bir jarym jasqa tolǵanǵa deıin onyń kútimine baılanysty aı saıynǵy memlekettik járdemaqy;
- birge turatyn tórt jáne odan kóp kámeletke tolmaǵan balasy, onyń ishinde 18 jasqa tolǵannan keıin bilim berý uıymdaryn bitiretin ýaqytqa deıin (23 jasqa tolǵanǵa deıin) jalpy orta, tehnıkalyq jáne kásiptik, orta bilimnen keıingi, joǵary jáne joǵary oqý ornynan keıingi bilim berý uıymdarynda jalpy bilim beretin nemese kásiptik baǵdarlamalar boıynsha kúndizgi oqý nysany boıynsha bilim alatyn balalary bar kópbalaly otbasylarǵa beriletin aı saıynǵy memlekettik járdemaqy;
- «Altyn alqa», «Kúmis alqa» alqalarymen nagradtalǵan nemese buryn «Batyr ana» ataǵyn alǵan, І jáne ІІ dárejeli «Ana dańqy» ordenderimen nagradtalǵan kópbalaly analarǵa beriletin aı saıynǵy memlekettik járdemaqy.
- Arnaýly memlekettik járdemaqy;
- Múgedektigi bar balany tárbıelep otyrǵan anaǵa nemese ákege, bala asyrap alýshyǵa, qorǵanshyǵa (qamqorshyǵa) taǵaıyndalatyn jáne tólenetin memlekettik járdemaqy, birinshi toptaǵy múgedektigi bar adamǵa kútim jasaıtyn adamdarǵa beriletin memlekettik járdemaqy.
Járdemaqylar taǵaıyndalady:
- «Azamattarǵa arnalǵan úkimet» memlekettik korporatsııasy arqyly;
- egov.kz elektrondyq úkimet veb-portaly arqyly;
- uıaly baılanys abonenttik qurylǵysy arqyly (qyzmet alýshynyń uıaly baılanys abonenttik qurylǵysynyń telefon nómiri elektrondyq úkimet veb-portalynda tirkelgen jaǵdaıda);
- ekinshi deńgeıli bankterdiń aqparattandyrý obektileri arqyly.
Memlekettik qyzmet kórsetý merzimi:
- Memlekettik korporatsııaǵa júgingen sátten, qujattardy tirkegen sátten bastap – 7 jumys kúni;
- Portalǵa, ekinshi deńgeıli bankterdiń aqparattandyrý obektilerine nemese proaktıvti qyzmetke júgingen sátten keıin – 4 jumys kúni.
- Memlekettik korporatsııaǵa qujattardy tapsyrý úshin kútý ýaqytynyń eń uzaq ruqsat etilgen merzimi – 15 mınýt;
- Memlekettik korporatsııada qyzmet kórsetý ýaqytynyń eń uzaq ruqsat etilgen merzimi – 20 mınýt.
Qujat 2025 jylǵy 16 maýsymda kúshine enedi, buıryqpen tolyǵyraq siltemege ótip tanysýǵa bolady.
Aıta keteıik, bıyl bala týý men bala kútimine baılanysty shamamen 300 mlrd teńge járdemaqy tólendi.