Birqatar áleýmettik mekeme azyq-túlikti 500%-ǵa deıin qymbatqa satyp alǵan

ASTANA. KAZINFORM – 1100-den astam memlekettik mekemeler (mektepter, balabaqshalar, aýrýhanalar, balalar úıi jáne t.b) azyq-túlikti joǵary baǵamen satyp alǵan. Bul týraly Qarjylyq monıtorıng agenttigi málimdedi.

2024 jyly vedomstvo azyq-túlik baǵalaryn kóterýdiń 817 jaǵdaıyn anyqtaǵan, olarǵa qatysty materıaldar óńirlik komıssııalarǵa tapsyryldy.

685 mekemeniń memlekettik satyp alý kelisimsharttary qaıta qaralyp, nátıjesinde 370 mln teńgeden astam qarjy únemdeýge sebin tıgizdi.

Agenttik memlekettik mekemelerdiń azyq-túlik satyp alý qyzmetin qadaǵalap, "alyp-satarlyq" shemalardy anyqtaýǵa baǵyttalǵan jobany júzege asyrýda. Bul jumys kásiporyndardyń qyzmetine aralasýsyz, tek IT quraldaryn paıdalaný arqyly júrgiziledi. 

Júrgizilgen jumys nátıjesinde 69 tıimsiz deldal shettelip, 600 ákimshilik hattama toltyryldy, 11 mln teńge kóleminde aıyppul tólendi.

Osylaısha, Aqtóbe oblysynyń 80 balabaqshasynda QMA departamenti qabyldaǵan sharalary nátıjesinde qaraqumyqtyń, kartoptyń, sábizdiń, qanttyń, jumyrtqanyń jáne tuzdyń baǵasy tómendetildi. 

Máselen, bir kásipker balabaqshaǵa qaraqumyqtyń baǵasyn 500%-dan astam kóterip jetkizip bergen.

Qostanaıda 117 áleýmettik mekeme qaraqumyqty, qantty, pııazdy, kartopty jáne jumyrtqany 180%-ǵa deıin ústemaqy qosyp satyp alǵany anyqtaldy. QMA Departamentiniń aralasýynan keıin Qostanaı oblysyndaǵy barlyq memlekettik mekemelerde qosymsha kelisimsharttar jasalyp, nátıjesinde 60 mln teńgege jýyq qarjy únemdeldi.

Osyndaı jumystar Astanada jáne Qaraǵandy oblysynda 175 balabaqshada da júrgizilip, 100 mln teńgeden astam qarjy únemdeldi.

QMA memlekettik mekemeler ónim óndirýshilerden jáne iri kóterme saýdagerlerden tikeleı satyp alý, saýda ústemaqylaryn asyra kótergeni úshin ákimshilik jaýapkershilikti kúsheıtý, zańsyz alynǵan tabys kólemine para-par aıyppuldar qoldaný sııaqty baǵalardyń negizsiz ósýine jol bermeý boıynsha birqatar keshendi sharalar ázirledi.