Brıjıt Makronnyń ar-namysyn qorlaǵandar jazalanady

ASTANA. KAZINFORM — Parıj soty Frantsııa prezıdentiniń jubaıy Brıjıt Makronǵa qatysty kıberbýllıng pen jala jabý derekteri boıynsha 10 adamdy kináli dep tanydy. Bul týraly Kazinform agenttiginiń menshikti tilshisi jazdy.

Le Figaro basylymynyń málimetinshe, dúısenbi kúni, 5 qańtarda Parıjde Brıjıt Makronǵa qarsy ınternette qorlaý men jalǵan qaýeset taratqan aıyptalýshylarǵa úkim shyqty. Olar prezıdentpen jas aıyrmashylyǵy men jynysyna qatysty negizsiz aqparat taratqany úshin 6 aıǵa deıin bas bostandyǵynan aıyrý jazasyna kesildi.

Tergeý barysynda atalǵan adamdardyń birinshi hanym týraly ádeıi jalǵan málimetterdi ınternette taratqany anyqtaldy. Sot qorǵaý tarapynyń keıbir jazbalar men vıdeolardyń «ázil-ospaq sıpatta bolǵany» jónindegi ýájin qabyldamady. Kóptegen jarııalanymdar ondaǵan myń ret qaralǵan.

Sottalǵandardyń jasy 41 men 65 aralyǵynda. Olardyń segizi — er adam, ekeýi — áıel. Sot sheshimimen olarǵa kıberbýllıngke qarsy trenıngten ótý, sondaı-aq 8 aıǵa deıin shartty jaza túrindegi túrli jaza taǵaıyndaldy.

Onlaın qýdalaý isi Brıjıt Makronnyń 2024 jyldyń jazynda túsirgen shaǵymynan keıin qozǵalǵan.

Tergeý barysynda onyń transgender ekeni týraly jalǵan aqparatty keıbir jýrnalıster men blogerler, atap aıtqanda Natasha Reı men Amandın Roı taratqany, keıin bul málimetterdi AQSh-taǵy ýltraońshyl jýrnalıst Kendıs Oýens ilip áketkeni belgili boldy. Olar birinshi hanym er adam bolyp dúnıege kelip, Jan-Mıshel esimdi adam bolǵan jáne «ózge bireýdiń jeke tulǵasyn ıemdengen» degen negizsiz málimdemeler jasaǵan. Bul aqparattarǵa eshqandaı dálel joq.

Atalǵan is boıynsha sottalǵandardyń biri — Amandın Roı. Sot otyrysyna Brıjıt Makronnyń qyzy Tıffanı Ozer qatysyp, ınternettegi jala onyń anasynyń ǵana emes, búkil otbasynyń ómirine keri áser etkenin aıtty. Qazirgi tańda Makron jubaılary AQSh-ta Kendıs Oýenske qarsy sot isin jalǵastyryp jatyr.

Eske sala keteıik, buǵan deıin Frantsııa prezıdenti jubaıyn qorǵaý úshin «ǵylymı dálelder» usynatynyn jazǵan edik.