Brıjıt Bardonyń jeke zattary Parıjde aýktsıonǵa shyǵaryldy
ASTANA. KAZINFORM – Frantsýz aktrısasy ári ánshisi Brıjıt Bardonyń jeke zattary, onyń ishinde Repetto balet týflıi, gıtaralary, áshekeı buıymdary men Olivetti baspa mashınkasy Parıjde aýktsıonǵa shyǵaryldy, dep habarlaıdy Millon.com.
Frantsýzdyń Millon aýktsıon úıi Parıjdegi Hôtel Drouot ǵımaratynda Brıjıt Bardonyń Sen-Tropedegi jáne Parıjdegi úılerinen alynǵan 285 zatty saýdaǵa qoıdy. Aýktsıon aktrısanyń ómiriniń ár kezeńin – kıno juldyzy retinde tanylǵan shaǵynan bastap, bı men mýzykaǵa degen qyzyǵýshylyǵyn, jeke ómirin, úıleri men janýarlardy qorǵaý qyzmetin qamtıdy.
Aýktsıondaǵy erekshe zattardyń qatarynda Brıjıt Bardonyń Repetto balet týflıleri bar. Sondaı-aq qara tústi Repetto balet kostıými, gıtaralar, onyń Olivetti Lettera 22 baspa mashınkasy, fotosýretter, portretter men áshekeı buıymdar saýdaǵa qoıylǵan.
Aýktsıonda Brıjıt Bardonyń Sen-Tropedegi La Madrague úıinen alynǵan zattar da bar. Olardyń arasynda aktrısanyń shyǵarmashylyq joly men jeke ómirine qatysty buıymdar men estelik zattar kezdesedi.
Brıjıt Bardo 1950 jyldary halyqaralyq kıno juldyzyna aınaldy. Ásirese «Qudaı áıeldi jaratty» fılminen keıin álemge keńinen tanyldy.
Eske sala ketsek, aktrısa 2025 jylǵy 28 jeltoqsanda 91 jasynda qaıtys boldy.
Sondaı-aq Dıana hanshaıymnyń kóılegi bir mıllıonnan astam dollarǵa satylǵanyn jazdyq.
