Brıtnı Spırs óziniń mýzykalyq katalogyna qatysty quqyqty satty

ASTANA. KAZINFORM – Áıgili pop-juldyz Brıtnı Spırs Primary Wave baspasyna óziniń mýzykalyq katalogyna quqyqtardy satty, dep habarlaıdy NBC News.

Brıtnı Spırs pen Primary Wave arasyndaǵy kelisimniń quny shamamen 200 mln dollar boldy.

Debıýttik albomy 1999 jyly shyqqan Brıtnı Spırs «Oops!... I Did It Again!», «...Baby One More Time», «Gimme More», «Circus» jáne «Not A Girl, Not Yet A Woman» sııaqty tanymal hıtterdiń avtory.

44 jastaǵy pop juldyz 13 jylǵa sozylǵan qamqorlyqtan 2021 jyly qutyldy. 2023 jyly jaryq kórgen «Mendegi áıel» estelikterinde Spırs basqalardyń onyń ómiriniń barlyq qyryn qalaı qadaǵalaǵanyn egjeı-tegjeıli sıpattady. Kitap jaryqqa shyqqa alǵashqy aptada AQSh-ta onyń 1,1 mln danasy satyldy, al Universal Pictures kompanııasy keıinirek shyǵarmany ekranǵa túsirý quqyǵyn satyp alǵanyn jarııalady.

Brıtnı Spırs – sońǵy jyldary óz katalogtaryn satqan birneshe tanymal ártisterdiń biri. Bob Dılan óz jazbalarynyń quqyǵyn 2022 jyly Sony Music Entertainment kompanııasyna, al búkil katalogyn 2020 jyly Universal Music Group kompanııasyna berdi. Brıýs Sprıngstın óz katalogyn 2021 jyly Sony Music kompanııasyna shamamen 500 mln dollarǵa satqan.

Primary Wave kompanııasy Stıvı Nıks, sondaı-aq Prıns pen Bıggı Smolstyń mýzykasyna qatysty quqyqqa ıe. Olardyń saıtyndaǵy aqparatqa sáıkes, «Primary Wave katalogynda usynylǵan 1000-nan astam úzdik 10 sıngl jáne birinshi oryn alǵan 400-den astam hıt bar» dep jazylǵan.

Buǵan deıin elimizdiń Konstıtýtsııasynda avtorlyq quqyq pen zııatkerlik menshikti qorǵaý kúsheıtiletinin jazdyq.