British Council jáne Kcell aǵylshyn tilin oqyp-úırenýge arnalǵan mobıldi qyzmetti iske qosty
ALMATY. 1 naýryz. QazAqparat /Ádilet Musahaev/ - Búgin Almatyda British Council jáne GSM Qazaqstan/Kcell kompanııasy British Council materıaldaryn paıdalanýmen barlyq Kcell abonentterine aǵylshyn tilin SMS arqyly úırenýge múmkindik beretin «Kún tirkesi» mobıldi qyzmetin usyndy.
Qyzmetke jazylý arqyly kún saıyn apta boıyna paıdalanýshylar orys jáne qazaq tilderine aýdarylǵan aǵylshyn tilindegi bir sózdi jáne sol sózdi mysal retinde qoldanylǵan tirkesti alyp turatyn bolady. Apta aıaǵynda paıdalanýshylardyń barlyǵy sózder boıynsha tekserý testisin alady. Ár jazylýshy ózine laıyq: bastapqy, ortasha nemese tereńdetilgen deńgeıdi tańdaı alady.
«British Council úshin Qazaqstandaǵy úsh tildi saıasatty júzege asyrý maqsatynda GSM Qazaqstan/Kcell kompanııasymen birlesip aǵylshyn tilin úırenýge arnalǵan mobıldi servısti engizý úlken abyroı. Aǵylshyn tili mádenıetaralyq qatynas quraly retinde zor mańyzǵa ıe bolyp keledi jáne biz Qazaqstannyń barlyq turǵyndaryna aǵylshyn tilin British Council jasap shyǵarǵan materıaldardy jáne Kcell usynǵan mobıldi tehnologııalardy paıdalana otyryp úırený múmkindigin berýge qýanyshtymyz», - dep atap ótti Qazaqstandaǵy British Council dırektory Lına Mıloshevıch.
«Kún tirkesi» mobıldi servısi búkil álem boıynsha paıdalanýshylarǵa British Council oqý resýrstaryna qol jetkizýge múmkindik berý maqsatynda mobıldi telefondar men smartfondar arqyly aǵylshyn tilin úırenýge arnalǵan British Council ónimderiniń biri bolyp tabylady.
«Biz osyndaı qyzyqty ınnovatsııalyq jobanyń seriktesi bolýǵa qýanyshtymyz. SMS servısi - bul abonentter arasyndaǵy daýystyq emes eń tanymal qyzmet, jańa servıstiń qarapaıymdyǵy men yńǵaılylyǵy klıentterimizge unaıtynyna úmittenemiz. Búgin Qazaqstan turǵyndarynyń jartysy derlik bizdiń kompanııanyń abonentteri bolyp tabylady. Sondyqtan biz «Kún tirkesi» servısiniń qazaqstandyqtardyń aǵylshyn tilin belsendi úırenýlerine sebin tıgizetine senimdimiz», - deıdi GSM Qazaqstan/Kcell korporatıvtik kommýnıkatsııalar bóliminiń dırektory Aıda Dosaeva.
«Kún tirkesi» qyzmetine 1515 nómirine "easy", "medium" nemese "hard" sózi bar habarlama joldaý arqyly qosylýǵa bolady. Osydan keıin abonentke servıs quny men kórsetý tártibi týraly aqparat berilip, jazylý usynylady. «Jazylý» pármenin basý arqyly abonent kúnine bir ret habarlama alatyn bolady. Ár habarlamada úsh tilde úırený úshin tirkes nemese sóz beriledi. Apta aıaǵynda abonent ótilgen materıaldy tekserý úshin habarlama alady. Alynǵan habarlamanyń quny 7 teńge.
