British Airways koronavırýs saldarynan 12 myń jumys ornyn qysqartýy múmkin
LONDON. QazAqparat – Eýropanyń eń iri áýe kompanııalarynyń biri British Airways koronavırýs pandemııasyna baılanysty týyndaǵan daǵdarys saldarynan óz qyzmetkerleriniń tórtten bir bóliginen astamyn qysqartýy múmkin.
Seısenbi kúni jasaǵan málimdemesinde IAG (ICAGY) quryltaıshy kompanııasy British Airways-tyń óz kásipodaqtaryna qyzmetkerlerdiń kóp bóligine qatysty bolatyn jáne «12 myńǵa deıin qyzmetkerdiń jumystan shyǵarylýyna soqtyratyn» qaıta qurylymdaý baǵdarlamasy týraly eskertip otyrǵany jazyldy. Bul týraly CNN -ge silteme jasap QazAqparat habarlaıdy.
Quramyna British Airways pen Ispanııanyń Iberia áýe kompanııasy kiretin IAG kompanııanyń birinshi toqsandaǵy tabysy 13 paıyzǵa, 4,6 mlrd eýroǵa (5 mlrd AQSh dollary ) deıin tómendegenin, al aǵymdaǵy shyǵyndar 535 mln eýrony (579 mln AQSh dollary) quraǵanyn málim etti.
Ekinshi toqsandaǵy shyǵyndar odan da kóp bolatyny jáne «jolaýshylar aǵynyn 2019 jylǵy deńgeıge deıin qalpyna keltirý birneshe jyl ýaqyt alatyny» kútilip otyr.
Lufthansa (DLAKY) áýe kompanııasy da buǵan deıin osy aıda áýe parkin qysqartyp, bıýdjettik iýe jelileriniń birin jaýyp otyrǵany týraly jarııalaǵan. Lufthansa Germanııa, Shveıtsarııa, Avstrııa jáne Belgııa elderindegi birqatar ulttyq áýe tasymaldaýshylaryna ıe.
Airbus kompanııasy Eýropadaǵy 6000 qyzmetkerin jumystan shyǵardy.
Áýe kóligi Halyqaralyq qaýymdastyǵynyń aıtýynsha, tasymaldaýshylar tap bolǵan «ósip kele jatqan qarjy daǵdarysy» bıylǵy jyly tabystyń 55 paıyzǵa nemese shamamen 314 mlrd dollarǵa tómendeýine ákelýi múmkin.
Buǵan deıin osy aıda British Airways 30 000 qyzmetkerin demalysqa shyǵaryp, olar mamyr aıynyń sońyna deıin jalaqynyń 80 paıyzyn alǵan bolatyn, al Ulybrıtanııa úkimeti koronavırýs pandemııasy saldarynan jumys oryndaryn saqtap qalý baǵdarlamasynyń aıasynda alǵashqy 2500 fýnt sterlıng (3100 AQSh dollary) tóledi.
Áýe kóligi Halyqaralyq qaýymdastyǵynyń málimetinshe, Eýropada jolaýshylar tasymaly salasyndaǵy daǵdarys 6,7 mln jumys orny úshin qaýip týdyrtyp otyr.
Juma kuni Air France-KLM (AFLYY) Frantsııa úkimeti jáne bankterimen «birneshe apta talqylaǵan soń» daǵdarystan ótýge arnalǵan qaryz retinde 7 mıllıard eýro (7,6 mıllıard AQSh dollary) alǵanyn málimdedi.
