Brıtanııanyń moneta saraıy Djeıms Bondqa arnap 7 kelilik moneta shyǵardy
LONDON. QazAqparat - Ulybrıtanııanyń Koroldik moneta saraıy Djeıms Bond týraly «Ne vremıa ýmırat» 25-shi fılminiń shyǵýyna oraı estelik moneta men quıma altyn toptamasyn shyǵardy, dep habarlaıdy QazAqparat The Independent saıtyna silteme jasap.
Toptamaǵa salmaǵy 7 keli altyn moneta engen. Onyń dızaınyn Koroldik moneta saraıynyń qyzmetkeri Laýr Klensı ázirlegen. Monetanyń dıametri – 18,5 sm( nemese 7,2 dıýım). Bul - Koroldik moneta saraıy shyǵarǵan óziniń 1100 jyldyq tarıhyndaǵy monetalardyń eń úlkeni ári qymbaty. Onyń nomınaldy quny - 7000 fýnt.
Sondaı-aq toptamaǵa salmaǵy bir kelilik jáne eki kelilik altyn monetalar jáne kúmis monetalar kiredi. Sonymen qatar, Djeıms Bond týraly fılmderge arnalǵan álemdegi alǵashqy altyn jáne kúmis quımalar shyǵaryldy. Qymbat metall quımalary naýryz aıynyń ortasynda satylymǵa túsedi.
Jeti kelilik monetada Bondtyń Aston Martin DB5 markaly kóligi onyń tanymal BMT 216A nómirimen beınelengen. Al kóliktiń astynda 007 nómiri men tapansha tańbasy kórsetilgen.
