Brıtanııanyń Esseks graftyǵynda júk kóliginen 39 adamnyń denesi tabyldy
LONDON. QazAqparat – Esseks graftyǵynyń Tarrok qalasynda konteınerlik júk kóliginen 39 adamnyń denesi tabyldy. Olardyń 38-i – eresek, bireýi jasóspirimniń múrdesi, dep habarlaıdy QazAqparat «Independent» brıtandyq gazetine silteme jasap.
Polıtsııanyń boljamy boıynsha, júk kóligi Bolgarııadan kelip, Ýels graftyǵynyń Holıhed porty arqyly el aýmaǵyna 19 qazanda kirgen.
Jergilikti polıtsııanyń málimetinshe, quqyqqorǵaý organdary qylmystyq is qozǵaǵan. 25 jastaǵy soltústikırlandııalyq júk kóliginiń júrgizýshisi adam óltirdi dep aıyptalyp otyr. Máıitterdi sáıkestendirý protsesi bastalyp ketti. Alaıda polıtsııa bul is uzaqqa sozylýy múmkindigin boljap otyr.
«Essekste bolǵan qaıǵyly oqıǵa meni qatty kúızeltti. Oqıǵa ornynan sońǵy jańalyqtardy turaqty túrde alyp otyramyn. Іshki ister mınıstrligi naqty ne bolǵanyn anyqtaý úshin Esseks polıtsııasymen tyǵyz baılanysta bolady», - dep jazdy Twitter-degi paraqshasynda Ulybrıtanııa premer-mınıstri Borıs Djonson.
