Brıtanııalyqtar qazaqtyń ulttyq taǵamdaryn daıarlaýdy úırenip júr
HІH ǵasyrda eýropalyqtardyń ishinen birinshi bolyp Qazaqstandy zerttegen brıtanııalyq saıahatshylar Tomas jáne Lıýsı Atkınsondardyń urpaqtary ata-babasynyń izimen ótken jyly Almaty oblysyna saıahattady. Bul saparda olar jergilikti halyqtyń qonaqjaılyǵyna jáne ulttyq as mázirine tánti bolǵan eken. Brıtanııaǵa oralǵan soń qazaq taǵamdaryn saǵynǵanymen, dúkennen baýyrsaq izdep taba almaǵan. Qazaq stýdentteriniń sheberlik sabaqtarynan keıin olar tek baýyrsaq qana emes, ystyq taǵamdar da daıyndap úırendi.
«Menińshe, qazaqtyń ulttyq taǵamdaryn pisirý ońaı, dámi til úıiredi. Qarapaıym daıyndalatyn as mundaı tátti bolady dep kim oılaǵan?!», -deıdi pedagog Djıl Braýn.
Qazaqstandaǵy esten ketpes saıahattan keıin brıtanııalyqtar dostary men týysqandaryn jınap Uly dala eli týraly, onyń mádenıeti men dástúrleri jaıly jaıyp salady. Tanystyrylymdarynan soń jaqyndarynyń da qazaqtyń ulttyq as-mázirine degen qyzyǵýshylyǵy oıanady.
«Buryn-sońdy jylqynyń etin jep kórmegen brıtanııalyqtar qazynyń dámin unatyp qaldy. Keıbireýleri úıinde jylqy baǵyp otyrǵanymen, soǵymǵa ázirge jiberýge daıyn emes. Óıtkeni úı janýarlary olar úshin otbasylarynyń quramdas bóligi», -deıdi nesıe menedjeri Lız Braýn
Brıtanııalyqtar keıbir qazaq taǵamdaryn óte qunarly sanaıdy. Biraq Qazaqstanǵa kelgende tolyq adamdardy kóptep kezdestirmegenderine ań-tań. Aǵylshyndar muny jylqy etiniń quramynda aǵzaǵa kúsh-qýat berip, semizdikke aparmaıtyn tsınk pen proteınniń kóptigimen túsindirip otyr. Naǵyz qazaqtar sııaqty as ázirlep úırense de, olarǵa keıbir sózderdi aıtý ońaıǵa soqpaıtyn syńaıly. Bul kúni jas býyn ókilderi de ulttyq taǵamdarǵa degen qyzyǵýshylyq tanytty. Ásirese, olar Ulystyń uly kúni daıyndalatyn naýryz kójeni unatyp qaldy.
Ádette únemdi keletin aǵylshyn dastarhany búgin erekshe jaınap ketti. Dastarhanda baýyrsaq pen shelpek, naýryzkóje men qýyrdaq, tipti et tamaq ta bar.
Brıtanııalyqtardyń qazaq dástúrlerin meńgerip alǵandary sonshalyq, keterde qonaqtarǵa sarqyttan salyp berýdi de umytqan joq. Aǵylshyndar keler Naýryz merekesinde de tań qaldyrýǵa daıyn. Olar qazaq taǵamdaryn daıyndap qana qoımaı, kıiz úı quryp, ulttyq oıyndar uıymdastyrýdy josparlap otyr.
