Brıtanııalyq sarapshylar Qazaqstannyń ıadrolyq qarýǵa qarsy bastamalaryn talqylady
Kembrıdj, Oksford, Lafboro ýnıversıtetteriniń, sondaı-aq London ekonomıka jáne saıası ǵylymdar mektebiniń professorlary Nursultan Nazarbaevtyń jahandyq bastamalaryn jáne onyń qaýipsizdikti qamtamasyz etýge qosqan úlesin joǵary baǵalady.
Kembrıdj ýnıversıtetiniń ókili Nıkolas Reı:
«Bul bastama búkil álemde keń qoldaý taýyp, qazaqstandyq tájirıbe barlyq memleketter úshin úlgi bolady dep úmittenýimiz kerek», - dep qadap aıtty.
Al London ekonomıka jáne saıası ǵylymdar mektebiniń professory Krıs Aldenniń pikirinshe, qazir keıbir memleketterdiń ıadrolyq synaqtarǵa qaıtadan kirisýdi qalaıtynyn baıqaýǵa bolady.
«Biz onyń ákelgen qaıǵy-qasireti týraly oılanyp, qaıtalanbaýyn qadaǵalaýymyz kerek. Qazaqstan osy jaǵynan álemge úlgi», - dep túıindedi.
Іs-shara aıasynda akademııalyq orta ókilderdi Ulybrıtanııaǵa arnaıy is-saparmen kelgen eki qolsyz týǵan sýretshi Káripbek Kúıikovpen kezdesip, onyń eńbekterimen tanysty. Semeı polıgonynyń qurbany jáne ATOM jobasynyń qurmetti elshisi sarapshylarǵa qaıǵyly oqıǵanyń saldary jáne onyń qaıtalanýyna jol bermeý baǵytynda Qazaqstanda júrgizilip jatqan qyrýar jumystar týraly aıtyp berdi.
Qonaqtar sondaı-aq belgili brıtan rejısseri Andre Sıngerdiń «Jel qaıda soǵady» atty derekti fılmin tamashalady. Kórkem dúnıe áskerı tájirıbelerdiń qorqynyshty saldaryna tap bolǵan júzdegen myń adamnyń - Qazaqstan turǵyndarynyń tragedııasy týraly baıandaıdy.
Dóńgelek ústeldi uıymdastyrýshy - Qazaqstan Respýblıkasy Tuńǵysh Prezıdenti Qorynyń Ulybrıtanııadaǵy ókildigi eki eldiń sarapshylarymen álemdik qaýymdastyqtyń jahandyq máselelerdi turaqty túrde talqylaýdy josparlap otyr.
«Sarapshylardyń kópshiliginiń sózinen bizde bolyp jatqan oqıǵalarǵa degen qyzyǵýshylyqtyń zor ekenin baıqadyq. Ortalyq Azııa - qarqyndy damyp kele jatqan óńirlerdiń biri retinde, Qazaqstan osy aımaqtyń ortalyǵy retinde, beıbitshilik ıdeıalarynyń bastamashysy retinde, Eýrazııadaǵy syrtqy saıası oqıǵalardyń kópshiliginiń draıveri retinde bizdiń elge degen suranys joǵary», - dedi Elbasy Qorynyń Ulybrıtanııadaǵy ókili Ǵanı Bekenov óz sózinde.
