Brıtanııalyq sarapshylar qazaqstandyqtarǵa merekelik quttyqtaýlaryn joldady
ASTANA. QazAqparat - 140-tan astam ult pen ulys dostyq pen kelisimde ǵumyr keship jatqan el retinde Qazaqstannyń halyqaralyq qaýymdastyq aldyndaǵy ımıdji joǵary tur. Sondaı-aq memleket dinder men mádenıetter arasyndaǵy jahandyq dıalogty damytyp jatqandyǵymen tanymal. Bul brıtanııalyq sarapshylardyń pikir-paıymy. Bul týraly búgin 24.kz habarlady jáne ol saıtta birqatar sarapshylardyń Birlik kúni merkesine arnaǵan tilekterin jarııalady.
Rıchard Ýılıam Braıant Atkınson Anglıkan shirkeýiniń múshesi, Bedford qalasynyń Epıskopy. Hrıstıan dininiń ókili Qazaqstanda birneshe ret bolyp, Álemdik jáne dástúrli dinder lıderleriniń sezine qatysty. Epıskop tózimdilik mádenıeti men ózara syılastyqty damyta otyryp, zorlyq jáne ekstremızm ıdeologııasyna qarsy turýǵa bolatyndyǵyn tolyq moıyndaıdy. Ol Qazaqstannyń álemdik dinder men konfessııalar arasyndaǵy tikeleı suhbat alańyna aınalǵanyna qýanyshty. Epıskop sonymen birge Prezıdent Nursultan Nazarbaevtyń Qazaqstanda ómir súrip jatqan barlyq dinder men ulttar arasyndaǵy tatýlyqtyń damýyna qosqan rólin aıryqsha atady.
«Halyqty biriktirýde durys jol tańdaı bilý óte mańyzdy. Qazaqstan Prezıdenti memleket bolashaǵyn baǵamdap, durys jol tańdaı bildi. Prezıdent eldiń tarıhyna, mádenıetine jáne rýhanı túp-tamyryna erekshe kóńil bóledi. Ol sondaı-aq ár adam ulty men dinı senimine qaramastan beıbitshilik pen kelisimde ómir súretin memlekettiń bolashaǵyna zor senimmen qaraıdy»,-deıdi Bedford qalasynyń Epıskopy Rıchard Atkınson.
Al, World PR kompanııasynyń negizin qalaýshy jáne basshysy, 25 jyldan astam ýaqyttan beri álemdik bıznes-lıderleri men memleket qaıratkerlerine strategııalyq baılanys máseleleri boıynsha aqyl-keńes berýmen aınalysyp kele jatqan kásibı PR maman Patrık Robertson táýelsizdiktiń 25 jyly ishinde Qazaqstannyń oń ımıdji qalyptasyp úlgergenin aıtady.
«Dinder men mádenıetter arasyndaǵy jahandyq dıalogty damytý sııaqty iri saıası bastamalardyń arqasynda Qazaqstan álemdik arenada oıyp turyp óz ornyn ala bildi. Menińshe, bul Qazaqstannyń ózgege uqsamaıtyn erekshelikteriniń biri. Á degennen-aq, Prezıdent qoǵamnyń kóp etnıkaly jáne kópultty bolýyna, kóptildiliktiń damýyna basa nazar aýdardy. Jáne búginde bul júzege asty da. Al júıeli túrde uıymdastyrylyp turatyn Álemdik jáne dástúrli dinder lıderleriniń sezi batys halqy túsinetin mańyzdy messedjge aınaldy dese bolǵandaı»,-deıdi.
