Brıtanııalyq kınokompanııa Shyńǵyshan týraly fılmdi Qazaqstanda túsiredi
ASTANA. QazAqparat - Jaqynda Qazaqstan Respýblıkasy Mádenıet jáne sport mınıstrligi, Qazaq ǵylymı-zertteý mádenıet ınstıtýty jáne «SUPERB FILMS CORPORATION LIMITED» kınokompanııasy (Ulybrıtanııa jáne Soltústik Irlandııa Birikken koroldigi) kıno óner jáne mádenıet salasynda yntymaqtastyq týraly kelisimge qol qoıǵan bolatyn. Bul jóninde tolyǵyraq Qazaq ǵylymı-zertteý mádenıet ınstıtýtynyń bas dırektory Andreı Hazbýlatov aıtyp berdi.
«Jýyrda Astana qalasynda «SUPERB FILMS CORPORATION LIMITED» brıtanııalyq kınokompanııasymen yntymaqtastyq jónindegi úshjaqty kelisimge qol qoıyldy. Birden aıtaıyn, bul ázirge tek nıet qana, biraqty jemisti yntymaqtastyq bolady dep kútemin. Álemniń jetekshi «SUPERB FILMS» kınokompanııasymen yntymaqtastyq Qazaqstan kınematografııasynyń álemdik deńgeıge kóterilýine yqpaldasady dep oılaımyn. Bul - Elbasynyń otandyq kınoındýstrııa salasyna ınvestıtsııa tartý boıynsha tapsyrmasyn oryndaý. Atalǵan ko-vencher týraly kelisimder aıasynda (yntymaqtastyq jáne kooperatsııa) biz birneshe kınokartınalar túsirý jóninde ýaǵdalastyqqa qol jetkizdik. Yntymaqtastyq týraly usynys bir kúndik jumys emes ekendigi belgili. «SUPERB FILMS» - óz fılmderin túsirýge qomaqty bıýdjeti jetkilikti tanymal kompanııa. Belgili brıtanııalyq prodıýser jáne kompanııa basshysy Kent Volvın qazaqstandyq kınematografııa múmkindikterimen tanysý maqsatynda Qazaqstanǵa birneshe ret kelip, bizdiń tabıǵı- klımattyq jaǵdaıymyzǵa, keń-baıtaq jerimizge súısinip, óz joǵary baǵasyn berdi»,-dep atap ótti A.Hazbýlatov.
Brıtandyq kınokompanııanyń Shyńǵyshan týraly kórkem fılm, Isa paıǵambar týraly kórkem jáne derekti fılmder túsirý jospary bar. «Mundaı keń aýqymdy jobalar túsirý úshin de erekshe ásem jerler, tańǵajaıyp aımaqtar qajet, sondyqtan bolar túsirilimder Ulybrıtanııa, Úndistan jáne Qazaqstanda josparlanyp otyr. Kent Volvınniń pikirinshe, elimizdiń klımattyq jáne geografııalyq jaǵdaıynyń ártúrliligi iri aýqymdy tarıhı jáne kópshilik kórinisterdi túsirýge tıimdi qolaıly. Brıtanııalyq tarap bizden qazaqstandyq ártisterdi irikteý, onyń ishinde kópshilik kórinister uıymdastyrýda, sondaı-aq túsirilimder júrgizýde jergilikti ákimshilik organdarmen kelisý barysynda, uıymdastyrýshylyq máselelerde, sondaı-aq sol kezeńniń tarıhyn jetik biletin ǵylymı keńesshiler men sarapshylar usynýda kómek surap otyr»,-dep habarlady A.Hazbýlatov.
Óz kezeginde, ınsıtýt seriktesteri fılm kıno stsenarıılerin usynyp, kelisedi, kınofılmdi tolyq qarjylandyrýdy qamtamasyz etip, kınofılmniń shyǵarylýyn (montaj, dybystaý, tıtrler jáne t.b.), Qazaqstandy qatysýshy retinde kórsetip halyqaralyq prokatqa shyǵýyn qamtamasyz etedi.
«Bul rette aıta ketetin taǵy bir jaıt, qazaqstandyq tarap qarjylandyrýǵa qatyspaıdy. Sondaı-aq, biz bizdiń baǵynysty uıymdardaǵy bar rekvızıtterdi usyný arqyly kómek berýimiz múmkin. Bul strategııalyq yntymaqtastyqtaǵy basty jetistigimiz kınofılmder óndirisi, dıstrıbýtsııa, prokatqa shyǵarýdaǵy álemdik tájirıbemen tanysý bolyp otyr. «SUPERB FILMS» kınokompanııasynyń yntymaqtastyqqa qyzyǵýshylyǵy elimizdiń baı tabıǵı áleýetinde ǵana emes, kóptegen mádenıetter men dinder toǵysyndaǵy adamı áleýetimiz der edim. Bolashaqta bizdiń ataqty sportshylarymyz Golovkın, Ilın týraly fılmder túsirýimiz de múmkin»,-dep habarlady ol.
