Brıtanııalyq bıznesmender Qazaqstanda jańa ken oryndaryn ıgerýge ınvestıtsııa quıýǵa daıyn

LONDON. QazAqparat - Brıtanııalyq bıznesmender Qazaqstandaǵy geologııalyq barlaý jáne jańa ken oryndaryn ıgerýge ınvestıtsııa quıýǵa daıyn. Batys Aýstralııa men Kanadada sátti júzege asyryp kele jatqan jáne bizdiń memleket qoldanysqa engizgen geologııalyq barlaý boıynsha álemdik tájirıbe Tumandy Albıondaǵy ınvestorlardyń nazaryn aýdardy, dep habarlaıdy «Roadshow London 2020» sharasyna qatysqan QazAqparat tilshisi.

«Jer qoınaýy jáne jer qoınaýyn paıdalaný týraly» QR jańa kodeksindegi mańyzdy ózgerister shaǵyn ıýnıorlyq kompanııalar úshin sony múmkindikterge jol ashyp otyr. Búginde geologııalyq barlaý úshin 460 myń sharshy shaqyrym bólinip, 600-ge jýyq lıtsenzııa berildi. Oǵan degen suranys, ásirese, brıtanııalyq kompanııalar arasynda joǵary.

Qazaqstannyń Ulybrıtanııadaǵy elshiligi uıymdastyrǵan «Roadshow London 2020» sharasyna brıtanııalyq «Strategy International» uıymynyń atqarýshy tóraǵasy Pıter O’Keın, «Taý-Ken Samuryq» ulttyq taý-ken kompanııasy» AQ basqarmasynyń tóraǵasy Qanat Qudaıbergenov, Ulybrıtanııa halyqaralyq saýda mınıstrliginiń ókili Roz Land, «Astana» halyqaralyq qarjy ortalyǵynyń (AHQO bırjasy, AIX) qarjy rynoktaryn damytý boıynsha jetekshisi Tımýr Abýshkın, sondaı-aq taý-ken óndirisi salasyndaǵy jetekshi sheteldik mamandar qatysty.

Qazaqstan Respýblıkasy ındýstrııa jáne ınfraqurylymdyq damý vıtse-mınıstri Rýslan Báımishevtiń aıtýynsha, b úginde Qazaqstanda jańa ken oryndaryn ashýǵa óz septigin tıgizgisi keletin shaǵyn ıýnıorlyq kompanııalar shash etekten.

«Olardyń bizdiń elimizde jumys isteýge degen nıeti zor. Meniń oıymsha, osyndaı sharalar sol mekemelermen júzbe-júz kezdesýge mol múmkindik beredi», - dedi.

Brıtanııalyqtar bolsa, taý-ken ónerkásibiniń ınvestıtsııalyq jáne ınnovatsııalyq áleýetin arttyrý úshin Qazaqstanda kóptegen mańyzdy bastamalar qolǵa alynyp jatqanyna qýanyshty.

«Menińshe, Qazaqstannyń halyqaralyq ınvestorlar úshin tartymdylyǵy artyp keledi. Taý-ken sektoryndaǵy jańa kodeks, jýyq arada qabyldanǵaly jatqan jańa ekologııalyq kodeks, paıdaly qazbalar qory boıynsha halyqaralyq standarttar komıtetiniń qoldanysy Qazaqstanda bıznes júrgizýge qolaıly jaǵdaı týǵyzýda», – dedi Ulybrıtanııa halyqaralyq saýda mınıstrliginiń ókili Roz Land.

Úkimettik delegatsııa jáne qazaqstandyq kompanııalar budan keıin Kanadada ótetin jahandyq kórmege jol tartpaq. Jyl saıynǵy sharada Qazaqstan kúni uıymdastyrylyp, «Jer qoınaýy jáne jer qoınaýyn paıdalaný týraly» jańa kodekstegi ózgerister jáne alǵashqy nátıjeler týraly taǵy da aıtylady.