Brıtanııalyq «Oazıs» rok-tobynyń bıletterine qatysty daý zertteledi
LONDON. KAZINFORM — 15 jyldyq úzilisten keıin qaıta birikken brıtanııalyq «Oazıs» rok-tobynyń kontsertterine qatysty shý shyqty. Dınamıkalyq baǵa belgileý prıntsıpi arqyly satylǵan bıletterdiń quny sharyqtap ketken. Bul másele boıynsha, tipti, eldiń úkimet basshysy da alańdaýshylyq bildirdi. Endi qadaǵalaý organy bılet satqan kompanııany tekserip jatyr, dep habarlaıdy Kazinform tilshisi.
Aty ańyzǵa aınalǵan «Oazıs» rok-tobynyń ánshileri aǵaıyndy Gallaherler qaıta sahnaǵa shyǵady dep rıza bolǵan jankúıerlerdiń qýanyshy uzaqqa sozylmady. Kórermender bıletterdiń baǵasy eskertýsiz kóterildi dep shaǵymdandy. Myńdaǵan adam vırtýaldy kezekte uzaq ýaqyt kútip, qymbat bıletke tap bolǵan. Qaıta satýmen aınalysatyn saıttardaǵy baǵa tipti 4000 fýntqa deıin jetken.
«Menińshe, kontserttiń baǵasy tym joǵary. Men olardyń qaıta birigýi úshin qarajat qajet ekenin túsinemin. Biraq bul azdap alaıaqtyqqa uqsaıdy, ” — deıdi qala turǵyny.
Taǵy bir brıtanııalyq bul aqylǵa syımaıtynyn aıtyp, qurbysy árqaısysy eki jarym myń fýnt turatyn birneshe bılet satyp alǵanyn, bul tym qymbat ekenin alǵa tartqan.
«Men úshin bul topty qaıtadan sahnadan kórý úlken qýanysh. Biraq bılet baǵalary 3000 fýnt nemese odan da joǵary bolyp tur, ” — deıdi kórermenderdiń biri.
Básekelestik jáne naryqtar basqarmasy bılet satqan kompanııaǵa qatysty tergeý júrgizip, dınamıkalyq baǵa qalaısha belgilengenin anyqtaýdy josparlap otyr. Ol sondaı-aq tutynýshylarǵa bıletterdi qysqa ýaqyt ishinde satyp alýǵa qysym jasalǵan-jasalmaǵanyn tekseredi. Tipti úkimettegiler de bul jaǵdaıǵa baılanysty beı-jáı qalmady.
«Birinshiden, „Oazıstiń“ qaıta birikkeni óte jaqsy jańalyq. Biraq bılet baǵasynyń qymbat bolǵany qynjyltady. Men jankúıerlerdiń quqyqtary eskerilip, qaltany qaǵatyn baǵamen qaıta satylýyn toqtatýdy talap etemin. Biz bul másele jaıly keńes ótkizýdi bastadyq, ” — dedi Ulybrıtanııa premer-mınıstri Kır Starmer.
Dınamıkalyq baǵa belgileý — suranys artqan kezde baǵany qymbattatý strategııasy. Bul kóbine demalys maýsymyndaǵy áýe reısteri men qonaqúılerine qatysty bolatyn jaǵdaı. Sondaı-aq shaqyrý kóbeıgen kezde taksı tarıfterine de baılanysty qoldanylady. Kontsertterge qatysty strategııa AQSh-ta keń taraǵan, biraq Ulybrıtanııa men Eýropa úshin jańalyq.
«Menińshe, tutynýshylardyń quqyqtaryn qorǵaý máselesi nazardan tys qalǵan sııaqty. Birneshe saǵattyq onlaın kezekten keıin bıletterdiń qymbattaǵanyn bilgen halyqtyń kóńil-kúıi buzylýy zańdy. Bul jerde ashyqtyq máselesi eskerilmedi jáne jankúıerler baǵanyń ósýi múmkin ekenin aldyn ala bilmedi dep oılaımyn, ” — dedi básekelestik boıynsha sarapshy Shellıon Horn.
Toptyń málimdemesine sáıkes, olar da dınamıkalyq baǵa ósimi týraly bilmegen. H áleýmettik jelisinde shaǵymdanǵan jankúıerine Laıam Gallaher «únińdi óshir» dep jaýap berdi. Tusaýkeser albomy 30 jyl buryn shyqqan toptyń 2009 jyly tarap ketkeni belgili. Birikkennen keıingi alǵashqy kontserti kelesi jyldyń jazynda ótedi. «Oazıs» Kardıffte, Manchesterde, Londonda, Edınbýrgte jáne Dýblınde barlyǵy 14 ret óner kórsetedi.
Oqıǵalyq týrızm memleket bıýdjetin toltyrýdyń tıimdi ádisteriniń biri. Jaqynda ǵana Ulybrıtanııada gastroldik saparda bolǵan amerıkalyq ánshi Teılor Svıft keıbir esepteýler boıynsha, el ekonomıkasyna salyq túrinde 1 mıllıard fýnt ákelgen. Jankúıerler bıletke, jolaqysyna, qonaq úıge shyǵyndanyp, árqaısysy orta eseppen 848 fýnt jumsaǵan.
