Brıtanııalyq munaı kompanııasy Qazaqstanǵa qarsy aryz-talap túsirdi

ASTANA. KAZINFORM – Brıtanııalyq Victoria Oil&Gas munaı kompanııasy Energetıkalyq hartııa erejelerine súıenip, Qazaqstanǵa qarsy talap-aryz túsirdi, dep habarlaıdy Kazinform.

Aryz Investıtsııalyq daýlardy retteý jónindegi halyqaralyq ortalyqta (ICSID) tirkeldi. 

Energy Monitor qoǵamdyq qorynyń Telegram arnasynyń habarlaýynsha, 2021 jyldyń sáýir aıynda kompanııa Qazaqstanǵa qarsy júzdegen mıllıon dollar talap etetin aryz beretinin málimdegen edi. Bul talap Atyraý oblysyndaǵy Kemerkól ken ornyn barlaý jáne ıgerý týraly kelisimsharttyń buzylýynan týyndaǵan.   

Energy Monitor qoǵamdyq qorynyń dırektory Nurlan Jumaǵulov atalǵan talap-aryzdyń saıası astary da bar ekenin atap ótti.

− Statı isimen salystyrǵanda (Borankól men Tolqyn ken oryndary) Kemerkól ken orny júzdegen mıllıon dollar shyǵyndy aqtaıtyndaı aýqymdy emes. Sondyqtan bul talap-aryzdyń ekonomıkalyqtan góri saıası máni basym dep oılaımyn, - dedi ol. 

Onyń aıtýynsha, Victoria Oil&Gas 2005 jyly Saga Creek Gold Ltd kompanııasynan Kemerkól ken ornynyń 100% úlesin 8,5 mıllıon dollar qarjyǵa satyp alǵan. Kompanııa birneshe uńǵyma burǵylap, 15 mıllıon tonna munaı qory baryn anyqtaǵan. Alaıda, 2008 jyly jer qoınaýyn paıdalaný kelisimsharty kúshin joıdy, sebepteri esh túsindirilmedi.

Sol jyly Kemerkól ken ornyna quqyq «Bakyt Tau» JShS-ne 360 mıllıon teńgege berildi, al 2016 jyly «Ap-Nafta Opereıtıng» JShS-ne 1,36 mıllıard teńgege satyldy.