Brıtanııalyq bıznes Qazaqstanda ınvestorlar quqyǵyn qorǵaý júıesimen tikeleı baılanys ornatty
ASTANA. KAZINFORM — Almatyda Bas Prokýratýranyń Investorlardyń quqyqtaryn qorǵaý komıteti men Qazaqstandaǵy Ulybrıtanııanyń Saýda palatasy Yntymaqtastyq týraly memorandýmǵa qol qoıdy.
Komıtettiń baspasóz qyzmeti habarlaǵandaı, yntymaqtastyqtyń jańa formaty brıtanııalyq bıznes pen prokýratýra organdary arasynda tikeleı baılanys arnasyn quryp, ınvestorlardyń máselelerin jedel sheshýge jáne ákimshilik kedergilerdi azaıtýǵa múmkindik beredi.
Qujatqa Investorlardyń quqyqtaryn qorǵaý komıteti tóraǵasynyń orynbasary Azamat Dúısembekov pen Qazaqstandaǵy Ulybrıtanııanyń Saýda palatasy tóraǵasynyń orynbasary Dınara Tanasheva qol qoıdy. Kezdesýge halyqaralyq bıznes qaýymdastyq ókilderi men Palata músheleri qatysty.
Azamat Dúısembekov ınvestorlardyń quqyǵyn qorǵaý prokýratýra organdary jumysynyń negizgi baǵyttarynyń biri bolyp qala beretinin atap ótti. Memleket basshysynyń tapsyrmasy boıynsha elde bıznesti súıemeldeý jáne ınvestorlardyń quqyǵyn qorǵaý tetikteri kúsheıtilip jatyr.
— Memorandýmǵa qol qoıý brıtanııalyq bıznespen turaqty ári tikeleı kommýnıkatsııa arnasyn qurady. Bul ınvestorlardyń ótinishterine jedel áreket etip, ákimshilik kedergilerdi azaıtýǵa múmkindik beredi. Biz kinálilerdi izdeýge emes, naqty nátıjege — jańa jobalardy iske qosý men jumys oryndaryn ashýǵa basymdyq beremiz, — dedi Azamat Dúısembekov.
Dınara Tanashevanyń aıtýynsha, Investorlardyń quqyqtaryn qorǵaý komıtetiniń qurylýy jáne Bas prokýrorǵa Investıtsııalyq ombýdsmen fýnktsııalarynyń berilýi halyqaralyq bıznestiń Qazaqstanǵa degen senimin nyǵaıtqan mańyzdy qadam boldy.
— Bul ınvestorlardyń quqyǵyn qorǵaý kepildikterin kúsheıtip, Qazaqstannyń sheteldik kompanııalar úshin ashyq ári túsinikti jumys sharttaryn qalyptastyrýǵa daıyn ekenin kórsetedi, — dep atap ótti ol.
Kezdesý barysynda bıznes ókilderi óz máseleleri boıynsha komıtetke tikeleı júgindi. Keıbir ótinish sol alańda birden jumysqa qabyldandy.
Qatysýshylarǵa Investorlardyń quqyqtaryn qorǵaý komıtetiniń negizgi qyzmet baǵyttary tanystyrylyp, halyqaralyq bıznes qaýymdastyǵymen aldaǵy yntymaqtastyq máseleleri talqylandy.
Buǵan deıin ınvestorlardyń quqyqtaryn qorǵaý komıteti óńirlerdegi jumysty kúsheıtip jatqany habarlandy.
