Brıtanııada ysyrap bolǵan tamaq úshin aıyppul engizýdi usynýda
ASTANA. 4 maýsym. QazAqparat - Brıtandyq parlament músheleriniń toby eldegi jeke sektorda jáne óndiristerde óte kóp tamaq ónimderi ysyrap bolyp, laqtyrylatynyn alǵa tartyp otyr.
Osy oraıda olar el úkimetin azyq-túlik qaldyqtary kólemin qysqartý úshin pármendi sharalar qabyldaýǵa shaqyrdy.
VVS-diń jazýynsha, bul bastamanyń avtorlary azyq-túlikke eleýli túrde uqyptylyqpen qaraý arqyly osy sektordaǵy shyǵystardy aıtarlyqtaı qysqartýǵa múmkindik beredi dep túsindirýde.
Keıbir málimetterge sáıkes, qazirgi kezde brıtandyq ortasha otbasyda satyp alynǵan tamaq ónimderi men sýsyndardyń 20 paıyzǵa jýyǵy laqtyrylady eken.
Parlament ókilderi mınıstrlerge azyq-túliktiń óndirýshileri men satýshylary úshin, sondaı-aq meıramhana sektory úshin tamaq qaldyqtaryna lımıt bekitýdi jáne normalardy oryndamaǵandarǵa aıyppul salýdy usynyp otyr.
Buǵan qosa bastama toby qoqysqa shyǵarylǵan tamaqty tıimdi paıdalanýdyń tetigin ázirleýdi de usynýda.
