Brıtanııada oqýyn aıaqtaǵan sheteldik stýdentter elden ketirilmek
ASTANA. QazAqparat - Brıtanııalyq bılik ımmıgratsııany qysqartý boıynsha qatań sharalaryn jalǵastyrýda. Sońǵy jyldary birikken koroldikke kóptep kelgen sheteldik stýdentterge qatysty jaǵdaıdy qalpyna keltirý úshin ІІM daıyndaǵan sharalar kesheni soǵan dálel.
Jańa erejeler 2015 jyly mamyrda ótetin saılaýda konservatorlar jeńiske jetken jaǵdaıda engiziledi dep boljanýda, dep habarlady Press Assoshıeıshn agenttigi. Oǵan sáıkes Eýroodaqqa kirmeıtin memleketterden kelgen stýdentter oqýyn támamdaǵan soń birden elden ketýge májbúr bolady.
Qazirgi ýaqytta stýdentterdiń basym bóligi oqýyn bitirgennen keıin az ǵana kúnderdiń ishinde vızasyn jumys vızasyna qaıta rásimdep alady. Bul úshin olarǵa Birikken Koroldikten ketýdiń qajeti joq. Keıbireýleri resmı kóshi-qon organdaryna barmaı-aq, elde zańsyz da júre beredi.
Press Assoshıeıshn derekterine saı, eldiń ІІM basshysy Tereza Meı ımmıgratsııa boıynsha statıstıka jarııalanǵan soń osyndaı qatań sharaǵa kóshti. Bul málimetterge sáıkes, 2013 jyldyń maýsym aıynan 2014 jyldyń maýsymyna deıin elge kelgen sheteldikterdiń sany 260 myń adamdy quraǵan.
Aıta keteý kerek, qazirgi premer-konservator Devıd Kemeronnyń saılaý aldynda bergen ýádeleriniń biri 2015 jylǵa qaraı ımmıgranttardyń elge kelý kórsetkishin «jylyna 100 myń adamnan kem» deńgeıine deıin jetkizý bolatyn.
