Brıtanııada musylmandar sınagoga shirkeýin jabylyp qalýdan qutqardy
ASTANA. 10 mamyr. QazAqparat - Brıtandyq Bredford qalasynda musylmandar jergilikti ıýdeılerdiń jabylý qaýpi tóngen kóne sınagoga shirkeýine arasha tústi. Bul jaıynda Dhnet.be habar taratty.
1880 jyly turǵyzylǵan ıýdeılerdiń ǵıbadat úıi qıraýdyń aldynda tur. Ony qalpyna keltirý úshin qarasy az jergilikti jamaǵattyń shamasy keler emes.
muslim.kz saıtynyń jazýynsha, olarǵa qolushyn sozǵan birneshe musylmandar uıymy sınagogany jóndeýden ótkizý úshin jylý jınaıdy.
Musylmandar jamaǵaty alǵashqy kúni 2,5 myń eýro mólsherinde qarajat jınaǵan.
Bredford qalasyndaǵy meshitter keńesiniń hatshysy Zúlfııa Kárımanyń sózine qaraǵanda, jergilikti musylmandar jamaǵaty belsendilik tanytyp, ózge din ókilderimen qatynas ornatýda úlgi kórsetip otyr.
Iýdeıler qaýymy musylmandardyń bul qadamyna rıza bolyp, alǵystaryn bildirdi.
