Brıtanııada koronavırýsqa qarsy vaktsına egý kelesi aptada bastalady
NUR-SULTAN. QazAqparat - Brıtandyq MHRA turaqtandyrýshy organy turǵyndardy Covid-19 vırýsynan 95%-ǵa deıin qorǵaýǵa qabiletti vaktsınany egý kelesi aptada bastalatynyn málimdedi, dep habarlaıdy QazAqparat VVS-ge silteme jasap.
Ekpeni qajet etetin adamdarda, máselen, qarttar úıindegi qarııalarda vaktsına qabyldaǵannan keıin ımmýndaý protsesi birneshe kúnniń ishinde bastalýy múmkin.
Brıtanııa 40 mıllıon ekpege tapsyrys berdi. Bul 20 mıllıon adamǵa vaktsına jasaý úshin jetkilikti.
Premer-mınıstr Borıs Djonson Tvıtterde «Bul bizge qalypty ómirimizdi qaıtarýǵa jáne ekonomıkamyzǵa serpin ákelýge kómektesetin vaktsına» dep jazdy.
Densaýlyq saqtaý mınıstri Mett Henkok BBC Breakfast-qa bergen suhbatynda ekpe jasatý kezegi kelgende NHS adamdarǵa habar beretinin aıtty.
Sondaı-aq, ol kóktemnen, Pashadan bastap jaǵdaı jaqsaryp, jazda adamdar alańsyz demala alatynyna senimdi ekenin jetkizdi.
50-ge jýyq aýrýhana ekpeni kútip otyr. Qazirgi ýaqytta májilis-ortalyqtary syndy jerlerde vaktsına jasaýǵa arnalǵan oryndar daıyndalyp jatyr.
NHS atqarýshy dırektory Saımon Stıvens densaýlyq saqtaý qyzmeti «el tarıhyndaǵy eń aýqymdy vaktsınatsııalaý protsesine daıyndalyp jatqanyn» málimdedi.
Sarapshylardyń pikirinshe, vaktsınatsııa bastalǵanymen adamdar koronavırýs talaptaryna muqııat bolyp, áleýmettik qashyqtyq pen maska taǵý erejesin saqtaǵany abzal.
