Brıtanııada Covid-19 vırýsymen baılanysty qylmystar sany artty
NUR-SULTAN. QazAqparat - Pandemııa jylynda brıtanııalyq polıtsııa Covid-19 vırýsymen tikeleı baılanysty 6 myńnan astam qylmysty tirkedi, dep habarlaıdy QazAqparat BBC-ge silteme jasap.
Buǵan ulttyq densaýlyq saqtaý júıesiniń (NHS) kompıýterlerin buzý, vaktsınany jetkizý júıesine hakerlik shabýyldar, vaktsınatsııa naýqanyna aralasý, bopsalaý jáne jelidegi bopsalaý kiredi.
Mysaly, kıberqylmyskerler aýrýhanalardyń jedel járdem júıesine zııandy baǵdarlamalyq qamtýdy engizýdi úırengen jáne ony tek kóp aqsha berse ǵana alyp tastaýǵa kelisedi.
Sondaı-aq jekelegen azamattarǵa qatysty qylmystardyń sany da kúrt ósti.
Polıtsııanyń málimetinshe, 2020 jyldyń 1 naýryzynan bastap qylmyskerler alaıaqtyq shemalar arqyly Brıtan araldarynyń turǵyndarynan 34,5 mıllıon fýnt sterlıng urlap alǵan.
Sebebi, karantın ýaqytynda adamdar tek onlaın rejıminde satyp ala bastady jáne meken-jaılaryn azyq-túlik jetkizý qyzmetteri nemese jelidegi ártúrli satýshylarǵa bere bastady.
Mysaly, kóptegen adamdardy aqshasynan aıyrǵan alaıaqtardyń sońǵy iri shemasy halyqtyń poshta qyzmetterin jıi paıdalanýyna baılanysty qurylǵan. Kıberqylmyskerler koroldik poshta saıtyna uqsas saıt quryp, adamdarǵa olardyń sálemdemeleri jergilikti poshta bólimshesinde ekendigi týraly habarlamalar jibergen. Alaıda keıbir jańa sharttar boıynsha aldymen bir-eki fýnt tóleý kerek delingen.
Habarlamada tólem jasaý úshin koroldik poshtanyń jalǵan saıtyna silteme jasalǵan, onda birneshe aıla-sharǵy jasaý arqyly alaıaqtar paıdalanýshynyń banktik derekterine qol jetkizgen.
Tanysý saıttarynda bopsalaý áreketteri kóbeıgen. Qylmyskerler lokdaýnǵa baılanysty jalǵyz qalǵan adamdardyń osaldyǵyn paıdalanýda. Internette tanysqannan keıin, olar biraz ýaqyttan keıin birlesken demalys, emdelý jáne t.b. aqsha aýdarýǵa májbúrleýdiń jolyn tabady.
