Brıtanııa «velosıped revolıýtsııasyna» 248 mln. dollar bólmek
ASTANA. 18 tamyz. QazAqparat - Ulybrıtanııa úkimeti "velosıped revolıýtsııasy" aýqymynda velosıped ınfraqurylymyn damytýǵa 160 mln. fýnt sterlıngiden astam (248 mln. dollar) qarjy bóletin boldy. Bul týraly el premer-mınıstri Devıd Kemeron habarlady.
Qaýipsiz velosıped joldary 8 aǵylshyn qalasynda jáne 4 ulttyq saıabaqta paıda bolady.
Manchester, Bırmıngem, Nıýkasl, Lıds, Brıstol, Oksford, Kembrıdj jáne Norıdj qalalaryna úkimet jergilikti velosıped ınfraqurylymyn damytýǵa mıllıondaǵan fýnt sterlıng jumsaıdy. Kórsetilgen baǵdarlamaǵa Pık-Dıstrıkt, Saýz Daýns, Dartmýr, Nıý-Forest ulttyq saıabaqtary da ilikti.
Ótken jyly Ulybrıtanııa osy maqsatqa 42 mln. fýnt bólgen bolatyn. "Úkimet velosıpedti paıdalanýshylarǵa olardyń júrisin qaýipsiz ári yńǵaıly etýge múddeli, osy arqyly halyqty kóliktiń osy túrine otyrýǵa kóptep tartqymyz keledi", - dep málim etti Kemeron.
Brıtanııa turǵyndary bul bastamany quptap qarsy aldy. Velosıped kóligin kúndelikti ómirge engizýdi olımpıada chempıondary Denı Kıng, Laýra Trott jáne Djoanna Roýsell qoldaýda. Buǵan qosarymyz, elde velosıpedter úlken suraynysqa ıe bolyp otyr. Máselen, el astanasynyń meri Borıs Djonson London ishinde velosıpedti ǵana paıdalanatyn kórinedi. Ol jaqynda dúnıege kelgen Ýılıam hanzada men gertsogınıa Keıttiń sábıine úsh aıaqty velosıped syılapty.
