Brıtanııa úkimeti Eýropalyq odaqtan shyǵý týraly kelisim jobasyn maquldady
BRıÝSSELЬ. QazAqparat - Ulybrıtanııa Úkimeti eýropalyq odaqtan shyǵý sharttary týraly kelisim jobasyn maquldady. Bul týraly sársenbi kúni keshke el premer-mınıstri Tereza Meı málim etti, dep habarlaıdy «QazAqparat» HAA-nyń menshikti tilshisi.
«Mınıstrler kabınetiniń ujymdyq kelisimi kelesideı: Úkimet shyǵý týraly (Eýropalyq odaqtan - avt.) kelisim jobasyn qoldaıtyn bolady», - dedi T.Meı kabınet múshelerimen ótken bessaǵattyq keńesten keıin jýrnalısterge.
Onyń aıtýynsha, brıtandyq Mınıstrler kabıneti atalmysh qujatqa qatysty «egjeı-tegjeıli ári qyzý pikirtalas» ótkizdi.
Sondaı-aq ol «breksıt» boıynsha kelisim jobasy laýazymdy tulǵalar men kelissózderdi júrgizýshilerdiń «myńdaǵan saǵattyq» jumysynyń nátıjesi bolǵandyǵyn atap ótti.
Brıtandyq úkimet basshysy maquldanǵan qujattyń mátinin beısenbi kúni tańerteń Parlamentte baıan etýge ýáde etti.
15 qarasha kúni tańerteń, sonymen qatar Eýropalyq keńestiń prezıdenti Donald Týsk pen Eýropalyq odaq tarapynan basty kelissóz júrgizýshi Mıshel Barne málimdemeler jasaıtyny kútilýde.
