Brıtanııa koronavırýsqa qarsy taǵy bir vaktsına qoldanbaq
LONDON. QazAqparat – Brıtan bıligi Oksford ýnıversıteti men AstraZeneca kompanııasy ázirlegen koronavırýsqa qarsy vaktsınany medıtsınalyq qoldaný úshin maquldady, dep habarlaıdy QazAqparat VVS-ge silteme jasap.
Ulybrıtanııa – AstraZeneca kompanııasynyń preparatyn maquldaǵan álemdegi alǵashqy el boldy. El bıligi atalǵan vaktsınanyń 100 mln dozasyna tapsyrys berdi. Bul 50 mln adamdy vaktsınatsııalaýǵa jetkilikti. Pfizer jáne BioNTech kompanııalarynyń vaktsınasyna berilgen tapsyrysty eskergende dozalar sany eldiń barlyq turǵyny úshin jetedi. Vaktsına 2020 jyldyń basynda ázirlengen. Sáýir aıynda alǵashqy eriktige synaq jasaldy. Keıinnen testileýge myń adam qatysty.
Atalǵan preparattyń -70 gradýs Tselsııden aspaıtyn temperatýrada saqtaýdy qajet etetin Pfizer jáne BioNTech vaktsınasynan aıyrmashylyǵy AstraZeneca vaktsınasyn qarapaıym tońazytqyshta saqtaýǵa bolady. Sondyqtan da ony tasymaldaý asa qıyndyq týǵyzbaıdy. AstraZeneca eldi aptasyna 2 mln dozaǵa deıin vaktsınamen qamtamasyz ete alatynyn habarlady.
Brıtanııada jappaı vaktsınatsııa bastalǵaly 600 myńnan astam adamǵa ekpe salynǵan. Premer-mınıstr Borıs Djonson vaktsınanyń jasalýyn brıtandyq ǵylymnyń jeńisi dep atady.
«Endi biz múmkindiginshe kóp adamdy jáne tezirek vaktsınatsııalaımyz», - dedi ol óziniń Twitter paraqshasynda.
Eldiń densaýlyq saqtaý mınıstri Mett Henkok VVS-ge bergen suhbatynda vaktsınanyń maquldanýyn vırýspen kúrestiń mańyzdy sáti dep atady.
«2021 jyl úmit pen qalpyna keltirý jyly bolýy múmkin. Óıtkeni biz pandemııadan qalaı shyǵýǵa bolatynyn kórip otyrmyz», - dep atap ótti ol.
AstraZeneca kompanııasynyń preparatymen vaktsınatsııalaý dúısenbi, 4 qańtarda bastalady dep kútilýde.
Brıtanııada ótken táýlikte 50 myń adam koronavırýs juqtyrdy. Osy ýaqytqa deıin 981 myń adam koronavırýstan kóz jumǵan.
